ޤަވާޢިދާ ޚިލާފަށް މަގުމަތީގައި ޕާކުކޮށްފައިވަނިކޮށް ފުލުހުން ޓޯކޮށްފައިވާ 58 ކާރާއި 180 ސައިކަލް ނައްތާލަން ފުލުހުން ނިއްމައިފިއެވެ.
ފުލުހުން ބުނީ ގަވާއިދާއި ހިލާފަށް ޕާކްކޮށްފައި ވަނިކޮށް ފުލުހުންގެ ބެލުމުގެ ދަށައް ގެނެސްފައިވާ އުޅަނދުގެ ތެރެއިން ބައެއް އުޅަނދު ނައްތާލާނީ ފުލުހުންގެ ޓޯޔާޑުގައެވެ. އަދި ބައެއް އުޅަނދުތައް ނައްތާލުމަށް ހަމަޖެހިފައިވަނީ ތިލަފުއްޓަށް ގެންގޮސްގެންނެވެ.
ފުލުހުން ބުނީ ނައްތާލާ އުޅަނދު ތަކަކީ ޤާނޫނީ ގޮތުން ފުރިހަމަ ކުރަންޖެހޭ ހުރިހާ މަރުޙަލާއެއް ފުރިހަމަ ކުރުމަށްފަހު، ވެރިފަރާތަށް ދޭންޖެހޭ މުއްދަތު ވެސް ދިނުމަށް ފަހު ނައްތާލުމަށް ގެންދާ އުޅަނދުތައް ކަމަށެވެ.
ޓްރާންސްޕޯޓް މިނިސްޓްރީގެ އާ އުސޫލުގައި ވަނީ ދެ ފުރޮޅަށް ވުރެ ގިނަ ގިނަ ފުރޮޅުލީ އުޅަނދެއް ރަޖިސްޓަރީ ކޮށްފައިވާ ފަރާތެއްގެ ނަމުގައި ރަޖިސްޓަރީ ކޮށްފައިވާ އެއްވެސް އުޅަނދެއް، އެ އުޅަނދު ރަޖިސްޓަރީ ކޮށްފައިވާ ޖަރާޖުގައި ޕާކް ނުކުރާކަން ނުވަތަ މަގުމަތީގައި ޕާކް ކުރާކަން ފާހަގަ ކުރެވިއްޖެނަމަ އެފަރާތަކަށް "އޭ" ޒޯނުގައި ދެ ފުރޮޅަށްވުރެ ގިނަ ފުރޮޅުލީ އެއްވެސް އުޅަނދެއް ރަޖިސްޓަރީ ކޮށް ނުދޭނެ ކަމަށް ވެސް ނިއްމާފައެވެ.