މާލެ އިން ފުރައިގެން ދ. ވާނީ އަށް ދަތުރުކުރި "ރަވާނާ" ބޯޓު ރޭ ފަތިހު ރޯވެ އަނދައިގެންދިޔުމާ ގުޅިގެން، ބޯޓުގައި ދަތުރުކުރި މީހުން ކޯސްޓް ގާޑުގައި މާލެ ގެނައި ތަނަށް ނައިބު ރައީސް ފައިޞަލް ނަސީމް ވަޑައިގެން އެމީހުންގެ ހާލު ބައްލަވައިލައްވައިފިއެވެ.
ރޭ ފަތިހު 04:45 ހާއިރު ހިނގި އެ ހާދިސާގައި އެކަކު ވަނީ މަރުވެފައެވެ. އެގޮތުން މަރުވެފައިވަނީ ބޯޓުން ދަތުރުކުރި ފުވައްމުލަކު ފިރިހެނެކެވެ. އޭނާ މަރުވެފައިވަނީ ފ. ނިލަންދޫ ހޮސްޕިޓަލުގައި ފަރުވާދެމުން ދަނިކޮށެވެ.
މައުލޫމާތު ލިބިފައިވާ ގޮތުގައި އޭނާ މަރުވެފައިވަނީ އަލިފާނުގެ ހާދިސާގައި ފިހިގެންނޫނެވެ. އެމްއެންޑީއެފްގެ އިންފޯމޭޝަން އޮފިސަރ ކެޕްޓަން އިބްރާހިމް އާޒިމް ވިދާޅުވީ ހާލު ސީރިއަސްވެގެން ހޮސްޕިޓަލަށް ގެންދިޔަ މީހާގެ ހަށިގަނޑުގެ އެއްވެސް ތަނެއް ފިހިފައި ނުވާކަމަށެވެ.
އޭނާ މަރުވެފައިވަނީ އެހާދިސާގައި ލިބުނު ކުއްލި ޝޮކަކުން ކަމަށް ޚަބަރު ލިބެއެވެ.
16 މީހުންނާއި އެކު ދަތުރުކުރި މި ބޯޓުގައި އަލިފާން ރޯވުމާއި އެކު ބޯޓުގައި ތިބި އެންމެން ވަނީ ލައިފްޖެކެޓް އަޅައިގެން ކަނޑަށް ފުންމާލާފައެވެ.
އަލިފާން ރޯވިއިރު ބޯޓުގައި ތިބީ ހަތް ދިވެހިންނާއި ނުވަ ބިދޭސީންނެވެ. އެއެންމެން އެސަރަހައްދުން ދަތުރުކުރި އެހެން ދޯންޏަކަށް ވަނީ ނަގާފައެވެ.
ބޯޓުގައި ރޯވި އަލިފާންގަނޑު އެއްކޮށް ނިއްވާލެވިފައިވާއިރު ބޯޓުގެ ބޮޑު ބައެއް ވަނީ އަނދާ ހުލިވެފައެވެ. އެ ބޯޓަކީ ފުވައްމުލަކަށް ނިސްބަތްވާ މުދާ އުފުލާ ބޯޓެކެވެ.