ހުކުރު ދުވަހުގެ ރޭ އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދުގެ ހާޒިރުގައި އެ ޕާޓީއަށް އައްޑޫން ސޮއި ކުރި 738 ޒުވާނުންނަށް އެމްޑީޕީގެ ޒުވާނުންގެ ހިތްވަރުން ވަރަށް ހޫނު މަރުޙަބާއެއް ކިޔާ ކަމަށް ޒުވާނުންގެ ހިތްވަރުން ބުނެފި އެވެ.
ހުކުރު ދުވަހުގެ ރޭ އައްޑޫ ސިޓީގަ ބޭއްވި މި ކުލަގަދަ ޙަފްލާގެ ބައިވެރިންގެ ތެރެއިން ގިނަ އަދަދެއްގެ މީހުން ސޮއި ކުރިކަމާއި އަދި މީގެ ތެރޭގައި ވަރަށް ގިނަ ޒުވާނުން ސޮއިކޮށްފައިވާކަން އެމްޑީޕީގެ ޒުވާނުންގެ ހިތްވަރުން ފާހަގަ ކުރެ އެވެ.
މީގެ ތެރެއިން އެ ރޭ އެމްޑީޕީ އަށް ސޮއި ކުރިވި ޒުވާނެއް ކަމަށްވާ ޝަފްޤާ އެމްޑީޕީ އަށް ސޮއި ކުރީ ކީއްވެގެންކަން ހާމަ ކުރަމުން ބުނީ އައްޑު އަށް އެމްޑީޕީގެ ތިން އަހަރުގެ ސަރުކާރުގަ އެތައް އެތައް ތަރައްޤީއެއް ގެނުވައި ދިން ކަމަށެވެ.
"ހުކުރު ދުވަހުރޭ ސޮއި ކުރި އެންމެހާ ޒުވާނުން ޤަބޫލުކުރާ ގޮތުގައި އެމްޑީޕީއަށް ވައުދުތައް ފުއްދޭނެ ކަމާއި މީގެ ކުރިން ވެސް ވަޢުދު ފުއްދާފައިވާ ހަމައެކަނި ޕާޓީއަކީ އެމްޑީޕީ ކަމާއި، އަދިވެސް ވަޢުދު ފުއްދޭނީ ހަމަ އެމްޑީޕީއަށް އެކަނިކަމުން އެމްޑީޕީ އަށް ގުޅުމަށް ނިންމީ،" އޭނާ ބުންޏެވެ.
އަދި ހަމަ އެރޭ ސޮއި ކުރި އެހެން ޒުވާނެއް ކަމުގައިވާ ޝޫޖް ވިދާޅުވީ އެމްޑީޕީ އަށް ސޮއި ކުރި އެންމެހާ ޒުވާނުން ވެސް ޤަބޫލު ކުރާ ގޮތުގައި އެމްޑީޕީއަކީ ސިޔާސަތުތަކެއް އެކުލަވާލާއި، މެނިފެސްޓޯއެއް އާންމުކުރާ ހަމައެކަނި ޕާޓީ ކަމާއި، ސާފު ސީދާ މިސްރާބަކަށް މަސައްކަތް ކުރާ ހަމައެކަނި ޕާޓީއަކީ އެމްޑީޕީކަމަށް ވުމުން އެމްޑީޕީއާ ގުޅުނީ ކަމަށެވެ.
މި އަހަރު ބާއްވާ ރިޔާސީ އިންތިޚާބަކީ ފުރަތަމަ ފަހަރަށް އަލަށް ވޯޓް ލެވޭ ގާތްގަނޑަކަށް 30،000 ޒުވާނުން ބައިވެރިވާ އިންތިޚާބުކަމާއި، އެމްޑީޕީގެ ޒުވާނުންގެ ހިތްވަރަށް ޔަޤީންކަން ލިބެނީ އައްޑޫ ސިޓީގައި ހުކުރު ދުވަހުގެ ރޭ ބޭއްވި ފަދަ ކުލަގަދަ ޙަފްލާއިން ޒުވާނުންގެ ޝައުގުވެރިކަން އިތުރުކޮށްދޭ އަދި ޒުވާނުންގެ އުއްމީދުތައް ފުރިހަމަ ކޮށްދޭ ހަމައެކަނި ޕާޓީއަކީ އެމްޑީޕީ ކަމަށް ޒުވާނުންގެ ހިތްވަރުން ބުންޏެވެ.