ފިލްމް"ޓޯޓަލް ދަމާލް" ޕާކިސްތާނުގައި ރިލީޒް ނުކުރާ ގޮތަށް އެ ފިލްމު އުފެއްދި ޓީމުން ނިންމާފައިވާ ކަމަށް ފިލްމުގެ ޑައިރެކްޓަރު އިންދްރަ ކުމާރު ބުނެފިއެވެ.
މި ފިލްމު ޕާކިސްތާނުގައި ރިލީޒް ނުކުރުމަށް އެ ޓީމުން ހޯމަ ދުވަހު ނިންމާފައިވަނީ ކަޝްމީރުގެ ޕުލްވާމާ ކިޔާ އަވަށަކަށް ދިން ހަމަލާއެއްގެ ސަބަބުން ކަމަށް ވެސް އެ ޓީމުން ވަނީ ބުނެފައެވެ.
"އިންޑިއާގެ ފިލްމު އިންޑަސްޓްރީގެ ހިއްސާއެއްގެ ގޮތުން މިއީ ޓީމްގެ ފަރާތުން ޓެރަރިސްޓް ހަމަލާއާއި ދެކޮޅަށް ތެދުވުމެއް. މިއީ އަހަރުމެންގެ ގައުމަށް ސަޕޯޓް ކުރުމަށް ކުރެވޭ ކަމެއް. ކީއްވެތަ އަހަރުމެންގެ ގައުމަށް ހަމަލާދޭ ބައެއްގެ ގައުމުގައި އަހަރުމެންގެ ފިލްމެއް އަޅުވަންވީ؟" އިންދްރަ ބުނެފައިވެއެވެ.
މި ފިލްމުގައި ފެނިގެންދާ އަނިލް ކަޕޫރު ، މާދުރީ، އަޖޭ ދޭވްގަން އަދި ރިތޭޝް ދޭޝްމުކްގެ ނިންމުމަކީ ވެސް މިއީ ކަމަށް އިންދްރަ ވަނީ ބުނެފައެވެ.
ފިލްމު ޕާކިސްތާނުގައި ރިލީޒް ނުކުރުމަށް ނިންމުމުގެ އިތުރުން މި ފިލްމުގެ ޓީމުން ވަނީ ހަމަލާގައި ދުނިޔެއަށް އަލްވަދާޢު ކިޔާފައިވާ ފަރާތްތަކުގެ އާއިލާތަކަށް 50 ލައްކަ އިންޑިއާ ރުޕީސް ހަދިޔާކޮށްފައެވެ. މި ހާދިސާގައި 40 މީހުން ވަނީ މަރުވެފައެެވެ.