ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި "އިސްލާމް ދީނުގެ ނަމުގައި އަނިޔާވެރިވުމަށް ގޮވާލުމަކީ ކޮން ކަހަލަ ކަމެއް ހެއްޔެވެ؟" މި ސުރުހީގެ ދަށުން ޖޫން 1، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————
"އިސްލާމްދީނުގެ ހިމާޔަތުގައި ދިވެހިން” މި ޝިއާރުގެ ދަށުން މާލޭގައި ހިންގި ހަރަކާތްތައް ފުޅާކޮށް، އެ ހަރަކާތުގެ މަޤްސަދުތައް އާންމު ކުރުމަށްޓަކައި، އުފެއްދި 23 ޑިސެމްބަރު އިއްތިހާދުގެ ވެބްސައިޓްގައި ބުނެފައި ވަނީ "މިއަދުގެ ގާނޫނާއި ގަވާއިދަކީ ރައްޔިތުން ނިކުމެ އިސްލާމްދީނާއި ދެކޮޅު މީހުން މެރުން. ހިތްވަރުދޭ މީހުން ވެސް މެރުން"، މީގެ އިތުރުން "އިސްލާމް ދީނަށް ގޮންޖަހާ ކޮންމެ ފަހަރަކު އެ މީހެއްގެ ފުރާނަ ދުއްވާލަން ދިވެހިން މިތިބީ ޕާޓީއަކަށް ބެލުމެއް ނެތި ތައްޔާރަށް" ކަމަށް ވެސް އެ ވެބްސައިޓުގައި ބުނެފައިވެ އެވެ. މި ވެ ބްސައިޓް ލޯންޗްކޮށްދެއްވީ އަދާލަތު ޕާޓީގެ ރައީސް ޝެއިޚް އިމްރާން އެވެ.
23 އިއްތިހާދުގެ މި ހަރަކާތުގައި، އެއްމެ ފުރަތަމަ ކުރި ކަމަކީ އޭރުގެ ސަރުކާރު ހިންގަން އޮތް ޕާޓީ، އެމްޑީޕީ އަކީ "ލާދީނީ" ޕާޓީ އެއްކަ މަށް ލޭބަލް ކުރުމެވެ. އަދި އެ ޕާޓީގެ އެއްމެހާ މެމްބަރުންނަ ކީވެސް “ލާދީނީ” މީހުން ކަމަށް ބުނެ ޕޯޑިއަމްތަކުގައި އަޑު އުފުލަން ފެށި އެވެ.
އެ ހަރަކާތުގެ ތެރެއިން، ދިވެހި ރާއްޖޭގެ ދިފާޢީ ބާރުތައް ގަނޑު ބަޑުކޮށް، ބަޣާވާތަކުން ރާއްޖޭގެ ވެރިކަން ވައްޓާލުމަށް ފަހު، އެބައި މީހުންގެ ވެބް ސައިޓުގައި އާއްމު ކުރި މަގްސަދުތައް ހާސިލްކުރުމުގެ މަސައްކަތް މިހާރު ވަނީ ފަށާފަ އެވެ.
އެއްވެސް ޝައްކެތް ނެތް މިންވަރަށް އެބައި މީހުންނާއި ދީނީ ގޮތުން އެއްމެ ބޮޑު ޚިޔާލު ތަފާތުވުމެއް އުފެދުނު ދީނީ އިލްމްވެރިޔަކީ ޑރ.އަފްރާޝީމް އަލީ އެވެ. ޑރ. އިބްލީސްގެ ނަމުން ލޭބަލް ކުރުމަށް ފަހު، ދެން ފެނުނީ 02 އޮކްޓޯބަރު 2012 ވަނަ ދުވަހުގެ ރޭ ދަންވަރު، ވަރަށް އަނިޔާވެރި ގޮތަކަށް ޑރ. އަފްރާޝީމް މަރާލި ތަނެވެ.
މަރުގެ ތުހުމަތު އެމްޑީޕީ ބޮލުގައި އެޅުވުމަށް ފަހު، މިއަދާ ޖެހެންދެން ވެސް އެކަން ވަނީ ސާބިތުކޮށް ނުދެވި އެވެ. ނަމަވެސް ޑރ. އަފްރާޝީމްގެ މަރާ ގުޅުވައިގެން އަންނަ ރިޔާސީ އިންތިޚާބުން އެމްޑީޕީ ބަލި ކުރުމަށްޓަކައި ކުރެވެން އޮތް ހުރިހާ ކަމެއް އެބައި މީހުން އެދަނީ ކުރަމުންނެވެ.
ދިވެހި ރާއްޖެއަކީ ސައްތައިން ސައްތަ މުސްލިމް ގައުމެއްކަމަށް ދައުވާ ކުރަމުން، ދީން ހިމާޔަތް ކުރުމުގެ ނަމުގައި، އެބައި މީހުންނާއި ދީނީ ގޮތުން ވިޔަސް، ސިޔާސީ ގޮތުން ވިޔަސް، ކުޑަ ނަމަވެސް ޚިޔާލު ތަފާތުވުމެއްވާ އެއްމެހާ ދިވެހިންނަކީ މަރާލަން ޖެހޭ “ލާދީނީ” ބައެެއް ކަމަށް ބުނެ، އަޑު އުފުލުމަކީ ދީނުގެ ނަމުގައި ހައްދު ފަހަނަޅައި ދިއުން ނޫން އެހެން ކަމެއް ނޫނެވެ.
އަޅުގަނޑުގެ މިލިޔުމާއި ގުޅިގެން މަރުގެ އިންޒާރު އަންނާނެކަން ޔަޤީނެވެ. އަދި 2008 ގެ ކުރިން ނަމަ ހިފާ ހައްޔަރުކޮށް އަދަބު ދޭނެކަން ޔަޤީނެވެ.