އިންޑިއާގެ ޖައްމޫ އަދި ކަޝްމީރްގެ ޕުލްވާމާގައި މިދިޔަ ބުރާސްފަތި ދުވަހު ދިން ޖާނުން ފިދާވުމުގެ ހަމަލާއެއްގައި މަރުވި ސެންޓްރަލް ރިޒާވް ޕޮލިސް ފޯސްގެ 23 އޮފިސަރެއްގެ ލޯންތައް މަޢާފްކޮށްދިނުމަށް ސްޓޭޓް ބޭންކް އޮފް އިންޑިއާ (އެސްބީއައި) އިން ނިންމައިފި އެވެ.
ފެބްރުއަރީ 14 ވަނަ ދުވަހު ދިން އެ ޓެރަރިސްޓް ހަމަލާގައި މަދުވެގެން 40 ފުލުހުން މަރުވެފައިވާއިރު، ފަސް މީހަކަށް ވަނީ އަނިޔާވެފައެވެ.
"ޕްރެސް ޓްރަސްޓް އޮފް އިންޑިއާ" އިން ރިޕޯޓްކުރާ ގޮތުގައި އެސްބީއައި އިން ނެރުނު ބަޔާނެއްގައި ބުނެފައި ވަނީ 23 ފުލުހަކު އެ ބޭންކުން ލޯން ނަގާފައިވާ ކަމަށާއި، އެ ލޯންތަކުގެ ބާކީހުރި ބައި ވަގުތުން ވަގުތަށް މަޢާފްކޮށްދިނުމަށް ނިންމާފައިވާ ކަމަށެވެ.
އެ 23 ފުލުހުންނަކީ ވެސް އެސްބީއައިގެ ޑިފެންސް ސެލެރީ ޕެކޭޖްގެ ދަށުން އެ ބޭންކްގެ ކަސްޓަމަރުންނެވެ. އެ ސްކީމްގެ ދަށުން ކޮންމެ ފުލުހަކަށް ވެސް 30 ލައްކަ ރުޕީސްގެ އިންޝުއަރެންސް ބޭންކުން ފޯރުކޮށްދެއެވެ. ސަރުކާރުގެ ހިއްސާވެސް އޮންނަ އެސްބީއައި އިން ވަނީ އެ އިންޝުއަރެންސްގެ ފައިސާ މަރުވި ފުލުހުންގެ އާއިލާތަކަށް ވީހާވެސް އަވަހަކަށް ދިނުމަށް ނިންމާފައެވެ.
މީގެ އިތުރުން ސަރުކާރުން ހުޅުވާފައިވާ "ބާރަތު ކޭ ވީރް" ވެބްސައިޓް މެދުވެރިކޮށް ޕުލްވާމާ ހާދިސާގައި މަރުވި ސިފައިންގެ އާއިލާތަކަށް އެހީތެރިކަން ފޯރުކޮށްދިނުމަށް އެސްބީއައި އިން ވަނީ އެ ބޭންކްގެ މުވައްޒަފުންގެ ކިބައިން އެދިފައެވެ.
ފެބްރުއަރީ 14ގެ ހާދިސާ އަށްފަހު އިންޑިއާ އާއި ޕާކިސްތާނާއި ދެމެދު އޮތް ގުޅުންތައް ވަނީ ވަރަށް ބޮޑަށް ހީނަރުވެފަ އެވެ. އެ ހަމަލާ އަށް ރައްދުދޭނެ ކަމަށް އިންޑިއާ އިން ބުނެފައިވާއިރު، ޕާކިސްތާނުން ބުނީ އެކަމާއިމެދު އިންޑިއާ އިން އިތުރަށް ވިސްނާނެ ކަމަށް އުއްމީދުކުރާ ކަމަށާއި، މި މައްސަލައިގައި ހަމަލާއެއް ދީފިނަމަ، ޕާކިސްތާނުން ވެސް ދިފާޢުގައި ހަމަލާދޭނެ ކަމަށެވެ.
އެ ހަމަލާގެ ޒިންމާ ހައްދުފަހަނަޅާފައިވާ ޓެރަރިސްޓް ގްރޫޕެއް ކަމުގައިވާ ޖައިޝް-އެ-މުހައްމަދު އިން ވަނީ ނަގާފައެވެ.