މައިލޯ ސްޓްރީޓް ސޮކާ 2019 ގައި ރޭ ކުޅުނު ތިން މެޗުގެ ތެރެއިން ދެ މެޗު އެއްވަރުވެއްޖެއެވެ. ރޭގައި ކުޅުނު މެޗުތަކުން ނަތީޖާ ނެރެވުނީ ސްކެވެންޖާސްއާއި ރޮޗެެސްޓާ ބައްދަލުކުރި މެޗުންނެވެ. މިމެޗު ސްކެވެންޖާސް ވަނީ 0-1 އިން މޮޅުވެފައެވެ.
ސްކެވެންޖާސް މެޗުން މޮޅުވެފައިވަނީ ފުރަތަމަ ހާފުގައި ހުސެއިން އަލީ ކާމިޔާބުކުރި ލަނޑަކުންނެވެ. އެއަށްފަހު މިމެޗުގައި އިތުރު ގޯލެއް ފެނިގެން ގޮސްފައެއް ނުވެއެވެ. މިމެޗުގެ މޮޅު ކުޅުންތެރިޔާގެ މަގާމު ހޯދާފައިވަނީ ސްކެވެންޖާސްގެ އަހުމަދު މުއާޒްއެވެ.
ޓީމް ގަރާޖް އަދި ނެކްސަސް ބައްދަލުކުރި މެޗުގައި ދެޓީމުންކުރެ އެއްވެސް ޓީމަކަށް ލަނޑެއް ޖެހިފައެއް ނުވެއެވެ. ނަމަވެސް ފުރަތަމަ ޑިވިޝަނުގައި ކުޅެމުން އަންނަ އަހުމަދު ނާޝިދު(ނާއްޓެ) ގެ ފަރާތުން ރޭގެ މެޗުގައިވެސް މޮޅު ކުޅުމެއް ފެނިގެން ދިޔައެވެ. އޭނާއަށް ވަނީ ރޭގެ މެޗުގެ މޮޅު ކުޅުންތެރިޔާގެ މަގާމުވެސް ލިބިފައެވެ.
ފަހު މެޗުގައި އެފްސީ ކިނބިވައު އަދި އެސްއެމްޓީ ބައްދަލުކޮށްފައިވާއިރު މިމެޗުގައި މޮޅު ކުޅުމެއް ދައްކާފައިވަނީ ކިނބިވައު ޓީމުންނެވެ. ނަތީޖާ ނުނެރުނު ނަމަވެސް ކިނވައު ޓީމުގެ މޫސާ ވަހީދު ދެއްކި މޮޅު ކުޅުމުގެ ސަބަބުން އޭނާއަށް ވަނީ މެޗުގެ މޮޅު ކުޅުންތެރިޔާގެ މަގާމު ލިބިފައެވެ.