ޔޫތް ޗެމްޕިއަންޝިޕްގެ ފައިނަލުގައި ޓީސީ ބަލިކޮށް، އީގަލްސް އިން ހަތަރުވަނަ ފަހަރަށް މުބާރާތް ކާމިޔާބުކޮށްފިއެވެ. ރޭ ކުޅުނު ފައިނަލް މެޗު އީގަލްސްއިން ކާމިޔާބުކުރީ 0-1 ގެ ނަތީޖާއަކުންނެވެ.
އެއްވެސް މެޗަކުން ބަލިނުވެ އީގަލްސްއާއި ޓީސީ ވެސް މުބާރާތުގެ ފައިނަލަށް ދަތުރުކޮށްފައިވާއިރު ޓީސީއިން މިފަހަރު ނިކުތީ 2016 ވަނަ އަހަރުގެ ފައިނަލްގެ ހިތި ހަނދާންތައް ފޮހެލުމަށް ފަހު އީގަލްސްގެ ކިބައިން ބަދަލު ހިފުމުގެ ރޫހެއްގައެވެ. އެފަހަރު ފައިނަލް މެޗު އީގަލްސް ކާމިޔާބުކުރީ 3-5 ގެ ނަތީޖާއިންނެވެ.
ނަމަވެސް އީގަލްސްއިން މިފަހަރުވެސް ފައިނަލް މެޗަށް ނިކުތީ ޓީސީއަށް ދޫދިނުމުގެ ރޫހެއްގައެއް ނޫނެވެ. އެއް ނަމްބަރު ކީޕަރު އަލީފަށް ސެމީގައި ރަތް ކާޑު ދެއްކި ނަމަވެސް އީގަލްގެ ބަދަލު ކީޕަރު ސިނާހުގެ ފަރާތުން ރޭގެ މެޗުގައި މޮޅު ކުޅުމެއް ފެނިގެން ގޮސްފައިވެއެވެ.
މެޗުގެ ހަމައެކަނި ލަނޑު 33 ވަނަ މިނެޓުގައި އީގަލްސްގެ އަޒްމޫން ކާމިޔާބުކޮށްފައިވާއިރު ފުރަތަމަ ހާފުގައި އޭނާ ޖެހި ލަނޑު ޗެމްޕިއަންކަން ހޯދުމަށް އީގަލްސްއަށް ފުދުނެވެ. މެޗުގެ މޮޅުކުޅުންތެރިޔާގެ މަގާމަށްވެސް ހޮވިފައިވަނީ އޭނައެވެ.
މިމުބާރާތް އީގަލްސްއަށް ކާމިޔާބުކުރުމުގައި ޓީމުގެ ކެޕްޓަން، އައްޑޫ ސިޓީގެ ހިތަދޫއަށް ނިސްބަތްވާ ހަސަން ރާއިފް އަހުމަދު(ހަންނާ) ގެ ދައުރު ބޮޑެވެ. ހަންނާ މުޅި މުބާރާތުގައި ދެއްކި ތަފާތު ކުޅުމުގެ ސަބަބުން އޭނާ ވަނީ މުބާރާތުގެ މޮޅު ކުޅުންތެރިޔާގެ މަގާމަށްވެސް ހޮވިފައެވެ. ހަންނާގެ އިތުރުން އީގަލްސްގެ ސައިފުﷲ އަދި ކުލަބު ގްރީން ސްޓްރީޓްސްގެ ކެޕްޓަން ޔާމީން އަދި ވިކްޓްރީގެ ކީޕަރު މާހީ އަބްދުﷲ ވަނީ މުބާރާތުގެ މޮޅު ފަސް ކުޅުންތެރިންގެ ތެރޭގައި ހިމެނިފައެވެ.
ހަންނާގެ އިތުރުންވެސް އައްޑޫއަށް ނިސްބަތްވާ ގިނަ ކުޅުންތެރިން ވަނީ މިމުބާރާތުގައި އެކި ޓީމުތަކުން ވިދާލާފައެވެ.