ހޮސްޕިޓަލަކީ ސިޔާސީ ހަރަކާތް ހިންގާ ތަނެއް ނޫން: އިމްރާން

ހޮސްޕިޓަލުތަކުގައި ހަމަނުޖެހުން ހިންގުމަކީ ސިޔާސީ ހަރަކާތް ހިންގުން ނޫން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ކުރީގެ ރައީސް އަބްދުﷲ ޔާމީން އިއްޔެ ހަވީރުގެ ވަގުތެއްގައި އައިޖީއެމްއެޗަށް ގެނައުމާ ގުޅިގެން އެމަނިކުފާނަށް ތާއީދުކުރާ ބައެއް ފަރާތްތަކާއި ފުލުހުންނާ ދެމެދު ކުރިމަތިލުންތަކެއް ވަނީ ހިނގާފައެވެ. އަދި ފުލުހުން ވަނީ އެ ފަރާތްތަށް މައިތިރިކުރުމަށް ޕެޕޭ ސްޕްރޭ ވެސް ބޭނުންކޮށްފައެވެ.

އިއްޔެ ހިނގާދިޔަ ކަންތައްތަކާ ގުޅިގެން މިނިސްޓަރު އިމްރާން މިއަދު ކުރެއްވި ޓްވީޓެއްގައި ވިދާޅުވީ ސްކޫލް އަދި ހޮސްޕިޓަލު ފަދަ ހިދުމަތްދޭ ތަންތަނަށް ގަދަބާރުން ވަދެ، ހަމަނުޖެހުން ހިންގުމަކީ ސިޔާސީ ހަރަކާތް ހިންގުން ނޫން ކަމަށެވެ. އަދި އެފަދަ ތަންތަނުގެ ސަލާމަތާ ރައްކާތެރިކަމަކީ އެންމެ އިސްކަންދޭނެ ކަންކަން ކަމަށާއި އަމަލުކުރަން އޮންނަ އުސޫލުން ބޭރުން ކަމެއް ހިންގާފައިވާނަމަ އެކަމެއް ހައްލުކުރައްވާނެ ކަމަށް މިނިސްޓަރު ވިދާޅުވިއެވެ.

އައިޖީއެމްއެޗް ހޮސްޕިޓަލުގައި ހިނގާދިޔަ ކަންތައްތަކާ ގުޅިގެން ފުލުހުން ނެރުނު ބަޔާނެއްގައި ބުނީ ޔާމީން ޑޮކްޓަރަށް ދެއްކެވުމަށް ގެންނެވި ވަގުތު އެމަނިކުފާނަށް ތާއީދު ކުރާ ބަޔަކު އެ ހޮސްޕިޓަލުގެ ހުޅަނގު ގޭޓުން ވަދެ، ހޮސްޕިޓަލުގެ ކާޑިއޮލޮޖީ ސެންޓަރު ގެ ތެރެއަށް ވަންނަން މަސައްކަތްކުރުމުން ފުލުހުން ތަކުރާރުކޮށް އެސަރަހައްދަށް ގިނަ އަދަދެއްގެ ބަޔަކު އެއްފަހަރާ ނުވަނުމަށް އެންގުމުންވެސް ނުކިޔަމަންތެރިކަން ދައްކާ އަޑުގަދަކޮށް، ގަދަކަމުން ހޮސްޕިޓަލް ތެރެއަށް ވަދެގަތުމަށް އުޅުން ކަމަށެވެ.

އެހެންކަމުން އެމީހުން ހުއްޓުވުމަށް ޕެޕާ ސްޕްރޭ ބޭނުން ކުރަން ޖެހުނު ކަމަށާއި އެސަރަހައްދުގައި ހިނގަން އުޅުނު ހަމަނުޖެހުން ކޮންޓްރޯލް ކުރުމަށް ފުލުހުން ޕެޕާ ސްޕްރޭ ބޭނުންކުރީ އެހާލަތުގައި ބޭނުން ކުރަން ޖެހުނު އެންމެ ކުޑަ މިންވަރަށް ކަމަށް ފުލުހުންގެ ބަޔާނުގައި ވަނީ ބުނެފައެވެ.

ފުލުހުން ވަނީ އެއްވެސް ފަރާތަކުން ހޮސްޕިޓަލުގެ ތެރޭގައި އެއްވެ އަޑުގަދަކޮށް ހަޅޭއްލަވާ ނުހެދުމަށް ވެސް ނަސޭހަތްތެރިވެފައެވެ.