ބަންގްލަދޭޝްގެ ވެރިރަށް ޑާކާގެ ތާރީޚީ ޗޯކްބާޒާރް ޑިސްޓްރިކްޓްގައި ހިނގި އަލިފާނުގެ ހާދިސާއެއްގައި މަދުވެގެން 78 މީހުން މަރުވެފައިވާ ކަމަށް އޮފިޝަލުން ބުނެފި އެވެ.
އެ އަލިފާންގަނޑު ރޯވެފައި ވަނީ މީހުން ދިރިއުޅޭ އިމާރާތެއްގައެވެ. "ބީބީސީ" އިން ރިޕޯޓްކުރާ ގޮތުގައި އެ އިމާރާތުގެ ގްރައުންޑް ފްލޯގައި އަލިފާން ހިފާ ޒާތުގެ އެއްޗެއް ރައްކާކޮށްފައި ހުރި ކަމަށެވެ.
އެ ހާދިސާގައި މަރުވި މީހުންގެ ތެރޭގައި ކައިވެންޏަކަށް ތައްޔާރުވަމުންދިޔަ ބަޔަކުވެސް ހިމެނެއެވެ. ނަމަވެސް މި ހާދިސާ ހިނގަން މެދުވެރިވި ސަބަބެއް އަދި ސާފެއް ނުވެއެވެ.
އެތައް ސަތޭހަ އަހަރުތަކެއް ވެފައިވާ ޗޯކްބާޒާރް ޑިސްޓްރިކްޓްގެ މަގުތައް ހަނިވެފައި، އިމާރާތްތަކާއި ގެތައް ހުންނަނީ ވަރަށް ކައިރި ކައިރީގައެވެ.
ބޮޑު އާބާދީއެއް އޮންނަ ބަންގްލަދޭޝްގައި ބޮޑެތި އިމާރާތްތަކުގައި އަލިފާނުގެ ހާދިސާތައް ހިނގުމަކީ ވަރަށް އާންމު ކަމެކެވެ. އޭގެ މައިގަނޑު ސަބަބެއް ކަމުގައި ބެލެވެނީ ސަލާމަތީ މިންގަނޑުތަކާއި އެއްގޮތަށް އިމާރާތްތައް ހަދާފައި ނުހުންނާތީ އާއި އެތަންތަނުގެ ޙާލަތު ދެރަވުމެވެ. އެފަދަ އަލިފާނުގެ ހާދިސާތަކުގައި ފާއިތުވި އަހަރުތަކުގައި އެތައް ސަތޭކަ މީހުންގެ ފުރާނަ ވަނީ ގެއްލިފައެވެ.
އެގޮތުން އާދިއްތަ ދުވަހުވެސް ޗިޓަގޮންގް ސިޓީގައި ހިނގި އަލިފާނުގެ ހާދިސާއެއްގައި ވެސް ނުވަ މީހުން ވަނީ މަރުވެފައެވެ.
"ބީބީސީ" އިން ރިޕޯޓްކުރާ ގޮތުގައި ޗޯކްބާޒާރުގެ އިމާރާތުގައި އަލިފާން ރޯވީ ބުދަ ދުވަހުގެ ރޭ އެތާ ގަޑިން 23:40 ހާއިރު ކަމަށާއި، އެވަގުތު މީހުން ތިބީ ނިދާފައި ކަމަށެވެ.
އަލިފާން އެންމެ ފުރަތަމަ ރޯވީ ގްރައުންޑް ފްލޯގައި ހުންނަ ކެމިކަލް ގުދަނެއްގައި ކަމަށާއި، އެއަށްފަހު ކޮންޓްރޯލް ނުވެ އަލިފާންގަނޑު އިތުރު ތިން އިމާރާތަކަށްވެސް ފެތުރިފައިވާ ކަމަށް އޮފިޝަލުން ބުނެއެވެ. އޭގެ ސަބަބުން ސަލާމަތްނުވެފައި އިމާރާތްތަކުގައި ގިނަ ބަޔަކު ތާށިވެފައި ތިބި ކަމަށްވެސް ރިޕޯޓްތައް ބުނެއެވެ.
މަންޒަރު ދުށް މީހުންނާއި ފުލުހުން ބުނާ ގޮތުގައި އަލިފާންގަނޑު އިތުރަށް ފެތުރުމަށް ދިމާވި ސަބަބަކީ ގޭސް ގޮވުންތައް ކަމަށެވެ.
ޑާކާ މެޑިކަލް ކޮލެޖުގެ ފޮރެންސިކް ޑިޕާޓްމަންޓްގެ އިސްވެރިޔާ ޑރ. ސޮހެއިލް މަހްމޫދު ވިދާޅުވީ މަރުވި މީހުންގެ އަދަދު 78 އަށް އަރާ ކަމަށާއި، އޭގެ ތެރެއިން 67 މީހެއްގެ ހަށިގަނޑު ކޮލެޖުގެ މޯޗަރީގައިވާއިރު، އަނެއް 11 މީހުންގެ ހަށިގަނޑު ވަނީ ހޮސްޕިޓަލުގެ މޯޗަރީގައި ކަމަށެވެ.
އެ ހާދިސާގައި މަރުވި މީހުންގެ ތެރޭގައި އިމާރާތްތަކުގެ ބޭރުގައި ތިބި މީހުންނާއި، ރެސްޓޯރެންޓެއްގައި ތިބި ބައެއް ގެސްޓުން ވެސް ހިމެނެއެވެ. ގިނަ މީހުންގެ ހަށިގަނޑުތައް ވަނީ ކާކުކަން ނޭނގޭ ވަރަށް އަނދާފައި ކަމަށް ރިޕޯޓްތައް ބުނެއެވެ.
އަނިޔާވި ބައެއް މީހުންގެ ހާލު ވަރަށް ސީރިއަސްއިރު، މަރުވި މީހުންގެ އަދަދު އަދި އިތުރުވާނެ ކަމަށް ލަފާކުރެވެއެވެ.
އެ ހާދިސާގައި ރޯވި އަލިފާންގަނޑު ނިއްވާލުމުގައި ފަޔާފައިޓަރުން ފަސް ގަޑިއަށްވުރެ ގިނައިރު މަސައްކަތް ކުރިއެވެ.
ޕްރައިމް މިނިސްޓަރ ޝެއިޚް ހަސީނާ ވަނީ އެ ހާދިސާގެ އަސަރުކުރި އެންމެންނަށް ހަމްދަރުދީ ފޮނުއްވައިފައެވެ.