2024 ވަނަ އަހަރު ޕެރިސްގައި ބޭއްވުމަށް ހަމަޖެހިފައިވާ އޮލިމްޕިކް ގޭމްސްގައި ބްރޭކްޑާންސިންގ ކުޅިވަރެއްގެ ގޮތުގައި ހިމެނުމަށް ހުށަހަޅައިފި އެވެ.
އެއީ އޮލިމްޕިކްސްގައި ހިމެނުމަށް މުބާރާތް ބާއްވާ ފަރާތުން އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އަށް ހުށަހަޅަން ނިންމާފައިވާ ހަތަރު ކުޅިވަރުގެ ތެރެއިން އެއް ކުޅިވަރެވެ. ބްރޭކްޑާންސިންގގެ އިތުރުން މުބާރާތުގައި ހިމެނުމަށް ހުށަހަޅާނީ ސާފިންގ އާއި ކްލައިމްބިންގ އަދި ސްކޭޓްބޯޑިންގ އެވެ. މި ހުރިހާ ކުޅިވަރުތައް ވެސް 2020 ވަނަ އަހަރު ޓޯކްޔޯގައި ބާއްވާ އޮލިމްޕިކް ގޭމްސްގައި ޑެބިއުކުރާނެ އެވެ.
ސްކްވޮޝް އާއި ބިލިއާޑްގެ އިތުރުން ޗެސް ވެސް ޕެރިސް ގޭމްސްގައި ހިމެނުމަށް ކެމްޕެއިންކުރި އެވެ. ނަމަވެސް އެ ތިން ކުޅިވަރު ވެސް މުބާރާތުގައި ބައިވެރިވިވުމުގައި ނާކާމިޔާބުވި އެވެ.
2018 ވަނަ އަހަރު ބުއެނޮސް އައިރެސްގައި ބޭއްވި ޔޫތު އޮލިމްޕިކް ގޭމްސްގައި ބްރޭކްޑާންސިންގ ވަނީ ހިމަނާފައެވެ.
އަންނަ އަހަރުގެ މުބާރާތުގައި ވެސް މި ކުޅިވަރު ހިމެނުމަށް ހުށަހެޅި ހުށަހެޅުމާއި ގުޅޭގޮތުން މަޝްވަރާކުރުމަށްފަހު ޑިސެމްބަރު 2020ގެ ކުރިން އައިއޯސީ އިން ގޮތެއް ނިންމަން ޖެހޭނެ އެވެ.
މިދިޔަ އަހަރުގެ ޔޫތު އޮލިމްޕިކްސްގައި ބްރޭކްޑާންސިންގ ނުވަތަ "ބްރޭކިންގ" ކުޅިވަރުގެ ފިރިހެން ބައިން ރަން މެޑަލް ހޯދީ ރަޝިއާގެ ސަރްޖެއި ޗެރްނިޝެވް އެވެ. އަދި އަންހެނުންގެ ބައިން ރަން މެޑަލް ހޯދީ ޖަޕާންގެ ރާމީ ކަވާއި އެވެ.