ދިވެހި ބަހުން ޑޮކްޓަރ އޮފް ފިލޯސަފީ (ޕީއެޗްޑީ) އަށް ކިޔަވައިދޭ ޕްރޮގްރާމެއް ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން މިއަދު ތަޢާރަފްކޮށްފި އެވެ.
މާދަރީ ބަހުގެ ދުވަހާއި ގުޅުވައިގެން އަލަށް ތަޢާރަފްކުރި "ޕީއެޗްޑީއިން އެޕްލައިޑް ލިންގުއިސްޓިކްސް" ޕްރޮގްރާމް އިފްތިތާޙްކުރުމަށް ބޭއްވި ރަސްމިއްޔާތުގައި، އެ ކޯހުގައި ބައިވެރިވުމުގެ ފުރުސަތު ލިބުނު ދަރިވަރުންނަށް އެކަމުގެ ލިޔުންތައް ހަވާލުކޮށްދެއްވީ ނިޝާނުލް އިއްޒައްދީންގެ ވެރިޔާ އައްބާސް އިބްރާހިމް އެވެ.
ތިން އަހަރުގެ މުއްދަތަކަށް ކުރިއަށްގެންދާ މި ކޯހަށް ވަނުމުގެ ފުރުސަތު ދީފައި ވަނީ ތިން ފަރާތަކަށެވެ. އެއީ އަންވަރު އިބްރާހީމް އާއި ޢަޒީޒާ އަފީފް އަދި އާމިނަތު ޒާހިރު އެވެ.
އެމްއެންޔޫ އިން ވަނީ ރާއްޖޭގެ ތާރީޚާއި ޘަޤާފަތާއި ގުޅޭގޮތުން ވެސް ޕީއެޗްޑީ ޕްރޮގްރާމެއް ހިންގުމަށް ނިންމާފައެވެ. ރާއްޖޭގެ ތާރީޚާއި ޘަޤާފަތާއި ގުޅޭގޮތުން ދިރާސާކުރުމުގެ ބައި ހިމަނާފައިވާ މި ކޯސް އަދި ކިޔަވައިދޭން ފަށާފައެއް ނުވެއެވެ.