އައްޑޫ ސިޓީ ހިތަދޫގެ ހިރާ ސްކޫލްގެ އާ އިމާރާތުގެ މަސައްކަތް ދެ މަސްތެރޭ ނިމޭނެ ކަމަށް އެ ސްކޫލް ހިންގުމުގައި އިސް ދައުރެއް އަދާކުރަމުން އަންނަ ޝައިހް މުހައްމަދު އަނީލު ވިދާޅުވެއްޖެއެވެ.
އަނީލް މިހެން ވިދާޅުވެފައިވަނީ އިއްޔެ އެޑިއުކޭޝަން މިނިސްޓަރު ޑރ. ޢާއިޝަތު އަލީ އެސްކޫލުގެ މަސައްކަތް ކުރިއަށް ދާގޮތް ބައްލަވާލަން ކުރެއްވި ޒިޔާރަތާއި ބެހޭ ގޮތުން "އައްޑޫލައިވް" އަށް މައުލޫމާތު ދެއްވަމުންނެވެ.
އަނީލް ވިދާޅުވީ މިނިސްޓަރު ކުރެއްވި ޒިޔާރަތަކީ އެސްކޫލުން ކުރަމުންދާ މަސައްކަތަށް ލިބުނު ހިތްވަރެއް ކަމަށާއި ސަރުކާރުން ޕްރައިވެޓް ސްކޫލުތަކައް ދެއްވާ އަހައްމީޔަތައް ސަރުކާރަށާއި އެޑިއުކޭޝަން މިނިސްޓްރީ އަށް ޝުކުރު ދަންނަވާކަމަށެވެ.
ހިރާ ސްކޫލްގެ އާ އިމާރާތުގެ މަސައްކަތާއި ގުޅޭގޮތުން މަޢުލޫމާތު ދެއްވަމުން އަނީލު ވިދާޅުވީ އިތުރު ކަމެއް ދިމާނުވާނަމަ އެއް މަސް ނުވަތަ ދެ މަސް ދުވަހުގެތެރޭ އެ އިމާރާތުގެ މަސައްކަތް ނިންމާ އެތަނުގައި ކިޔެވުން ފެށޭނެ ކަމަށެވެ. އަދި އުއްމީދަކީ އާ އިމާރާތާއެކު އެ ސްކޫލްގެ ކިޔެވުން އެއް ދަންފަޅިއަށް ބަދަލުކުރުން ކަމަށާއި އާ އިމާރާތާއި އެކު އާ ޙިދުމަތްތައް ވެސް ޤާއިމުވެގެންދާނެ ކަމަށް އަނީލު ވިދާޅުވިއެވެ.
އާއިމާރާތުގައި 30 ކްލާސް ރޫމާއި، ލެބޯޓްރީ އަކާއި ލައިބްރަރީއެއްގެ އިތުރުން، އިތުރު ހަރަކާތްތައް ހިންގުމަށް ޖާގަ އޮންނާނެކަމަށް އަނީލު ވިދާޅުވިއެވެ.
މީގެ އަހަރުތަކެއް ކުރިން 50 ދަރިވަރުންނާ އެކު ފެށި ހިރާ ސްކޫލްގައި މިހާރު 470 އަށް ވުރެ ގިނަ ދަރިވަރުން ތައުލީމު ހާސިލުކުރެއެވެ. ހިރާ ސްކޫލުގެ އަމާޒަކީ އެކާވީސް ވަނަ ޤަރުނުގެ ގޮންޖެހުންތަކާއި ކުރިމަތިލެވޭފަދަ، ފެންވަރު ރަނގަޅު ތަޢުލީމެއް ފޯރުކޮށްދީގެން، ޤާބިލު، ދިވެހި، މުސްލިމު ޖީލެއް ބިނާކުރުމެވެ.