ޔޫތް ލީޑަރސް ނެޓްވޯކްގެ މިދައުރުގެ ފުރަތަމަ މަސައްކަތުބައްދަލުވުން މިނިސްޓަރ އޮފް ހޯމް އެފެއާޒް ޢިމްރާން އަބުދުﷲ މިއަދު އިފްޠިތާހުކޮށްދެއްވައިފިއެވެ.
ހއ. އަތޮޅުގެ ރަށްތަކުން ޒުވާނުން ބައިވެރިވާ މި ބައްދަލުވުން ކުރިއަށްގެންދަނީ ޒުވާނުންނާއި މީޑިޔާ، މިޝިޢާރުގެ ދަށުންނެވެ.
ދެދުވަހުގެ މުއްދަތަށް ހޯރަފުށީގައި ކުރިއަށްގެންދާ މިމަސައްކަތު ބައްދަލުވުމުގައި މީޑިޔާގެ ދާއިރާއާއި، ދީނީ އިލްމާއި، ތާރީޚާއި، ޘަޤާފަތް ހިމެނޭގޮތަށް މައިގަނޑު ހަތް ސެޝަނެއް ވަނީ ހިމަނާފައެވެ. އެދާއިރާތަކުން ޒުވާނުންނަށް މައުލޫމާތު ދިނުމަށް ތަޖުރިބާ ލިބިލައްވާފައިވާ ބޭފުޅުން ބައިވެރިވެލައްވާނެއެވެ.
މިމަސައްކަތު ބައްދަލުވުމުގައި ރާއްޖޭގައި ރަޖިސްޓްރީކޮށްގެން ހިންގާ ނޫސްތަކުގެ މައުލޫމާތުދިނުމާއި، ޒުވާނުންގެ މެދުގައި ދީނީ އަޤީދާ ހަރުދަނާ ކުރުމަށް މައުލޫމާތު ދިނުމާއި، ޒުވާނުންގެ މެދުގައި އެއްބައިވަންތަކަން އިތުރުކުރުމާއި، ދިވެހި ސަޤާފަތާއި އާދަކާދަތައް ގެންލިގެން ނުދާނެގޮތް ހޯދުންފަދަ ބައިތައް ހިމެނޭ ކަމަސް ހޯމް މިނިސްޓްރީ އިން ބުނެއެވެ.
އަދި މިޕްރޮގްރާމްގެ ބޭނުމަކީ ހަރުދަނާ ޒުވާނުން ބިނާކުރުމަށް އެހީތެރިވެދިނުމެވެ. އަދި ޒުވާނުންނަކީ އެއްބައިވަންތަ، މައުލޫމާތު މުއްސަނދި، ދިވެހި ތާރީޚާއި، ޘަޤާފަތަށް ޝައުޤުވެރި ބަޔަކަށް ހެދުން ކަމުގައިވެސް ހޯމް މިނިސްޓްރީ އިން ބުނެއެވެ.
ޖުމްލަ ހަތް ރަށަކުން 80 އަށްވުރެ ގިނަ ޒުވާނުން ބައިވެރިވާ މިމަސައްކަތު ބައްދަލުވުމުގެ ތެރެއިން ޒުވާން އިސްވާރުންގެ ވިއުގަ ފުޅާކުރެވޭނެ ކަމަށް އެ މިނިސްޓްރީ އިން ބުނެއެވެ.