ސިޓީ ކައުންސިލްތަކަށް އެ ސިޓީތަކުގައި ކިޔަވައިދޭ ސްކޫލްތައް ހިންގުމުގެ ބާރު ދޭން ގަސްތުކޮށްފައިވާ ކަމަށް އެޑިއުކޭޝަން މިނިސްޓަރ، ޑރ. އާއިޝަތު އަލީ ވިދާޅުވެއްޖެއެވެ.
އައްޑުއާއި ފުވައްމުލަކަށް މިނިސްޓަރ ކުރައްވަމުން ގެންދަވާ ދަތުރުފުޅުގައި ފުވައްމުލަކަށް ވަޑައިގެން، ސިޓީ ކައުންސިލާ ބައްދަލުކުރައްވައި ދެއްކެވި ވާހަކަފުޅުގައި މިނިސްޓަރ ވިދާޅުވީ، މުސްތަގުބަލުގައި ސްކޫލްތައް ހިންގާނީ ކައުންސިލުން ތަމްސީލުކުރާ ބޯޑަކުން ކަމަށެވެ. އެއީ ސަރުކާގެ ލާމަރުކަޒީ ސިޔާސަތުގައި ހިމަނާފައިވާ ކަމެއް ކަން މިނިސްޓަރު ފާހަގަކުރެއްވިއެވެ.
ފުވައްމުލަކު ސިޓީ ކައުންސިލުން ވަނީ ކުރީގެ ރައީސް ނަޝީދުގެ ސަރުކާރުގައި ހުރި ގޮތަށް އެޑިއުކޭޝަން ޔުނިޓެއް ފުވައްމުލަކު ސިޓީ ގައިވެސް ގާއިމުކޮށްދެއްވުމަށް އެދިވަޑައިގެންފައެވެ.
މިނިސްޓަރު އައިޝާ އިތުރަށް ވިދާޅުވީ ކައުންސިލަށް ސްކޫލް ހިންގުމުގެ ބާރު ދިނުމުން އެ މިހާރަށްވުރެ ހަރުދަނާ ނިޒާމެއް ގާއިމްކުރެވޭނެ ކަމަށް އުއްމީދު ކުރައްވާ ކަމަށެވެ.