ކުރީގެ އޮޑިޓާ ޖެނެރަލް ނިޔާޒް އިބްރާހިމްގެ ވަރުގަދަ ތުހުމަތެއް އަނެއްކާވެސް އޭސީސީ އަށް އަމާޒުވެއްޖެއެވެ. ވަކި މެމްބަރެއްގެ ނަން ހާމަ ނުކުރައްވައި، ނިޔާޒް ރޭ ޕީއެސްއެމްގެ ޕްރޮގްރާމެއްގައި ވާހަކަ ދައްކަމުން ވިދާޅުވީ، ކުރީގެ ނައިބު ރައީސް އަހުމަދު އަދީބު އޭސީސީގެ މެމްބަރަކަށް ފަސް ލައްކަ ރުފިޔާ ދީފައިވާ ކަމަށެވެ.
ނިޔާޒް ވިދާޅުވީ އެ ކަން އެނގުނީ އަލްޖަޒީރާއިން ގެނެސްދިން "ސްޓީލިން ޕެރެޑައިސް" ޑޮކިއުމެންޓްރީއަށް ކުރި ތަހުގީގުގައި އަލްޖަޒީރާއެކު ކުރި މަސައްކަތުގެ ތެރެއިން ކަމަށެވެ. އެ މަސައްކަތަށް އަދީބުގެ ފޯނުން ދައުލަތުގެ އިސް ފަރާތްތަކަށް ކޮށްފައިވާ މެސެޖުތަކާއި މާލީ މުއާމަލާތްތަކުގެ މައުލޫމާތު ހާމަވެގެން ދިޔަ ކަމަށެވެ.
އަދީބާއި ގާތުން މަސައްކަތް ކުރި ބައެއް ފަރާތްތަކުން ވަނީ ކުރީގެ ރައީސް ޔާމީންގެ ގެކޮޅަށް ބޮޑެތި ފައިސާ ދަބަސްތަކުގައި ފައިސާ ގެންގޮސްދީފައިވާ ކަމަށާއި އެއީ އެމްއެމްޕީއާރްސީއަށް ލިބުނު ފައިސާ ކަމަށް ޑޮކިއުމެންޓްރީގައި ކިޔާ ދީފައެވެ.
ނިޔާޒް ވިދާޅުވީ އަދީބު ފައިސާ ޖަމާކުރުމަށް ފަހު އޭސީސީގެ މެމްބަރަށް މެސެޖުކޮށް ފައިސާ ޖަމާކުރެވުނު ކަން އެންގި ކަމަށެވެ. އަދި އެއީ ހަގީގަތް ކަމަށާއި އެކަން ތަހުގީގު ކުރަން ޖެހޭ ކަމަށް އޭނާ ވިދާޅުވިއެވެ. އޭގެ އިތުރުންވެސް އެތައް ބަޔަކާ ފައިސާގެ މުއާމަލާތް ކޮށްފައިވާކަން ފެންނާން ހުރި ކަމަށް ނިޔާޒް ތުހުމަތު ކުރެއެވެ.