އައްޑޫ ސިޓީ ހުޅުދޫގައި މަސައްކަތްކުރާ އެންޖީއޯއެއް ކަމުގައިވާ ޕްރޮގްރެސިވް އެސޯސިއޭޝަން އޮފް އަ ތޯޓްފުލް ހުޅުދޫ (ޕާތު) އިން އެ ރަށުގައި ކެރިއަރ ގައިޑެންސް ޕްރޮގްރާމެއް ބާއްވައިފި އެވެ.
ސީނު އަތޮޅު މަދަރުސާ އާއި ގުޅިގެން އިއްޔެ ކުރިއަށްގެންދިޔަ މި ޕްރޮގްރާމް ޚާއްސަކޮށްފައި ވަނީ ގްރޭޑް 9، 10 އަދި 11ގައި ކިޔަވާ ދަރިވަރުންނަށެވެ.
ޕާތު އިން ބުނީ މި ސެމިނާގެ މައިގަނޑު މަޤްސަދަކީ ސްކޫލް ނިންމާ ކުދިންނަށް އެކުދިން ކުރިއަށްދާނެ އެންމެ ރަނގަޅު މަގަކީ ކޮބައިކަން ބުނެދިނުން ކަމަށެވެ.
މި ސެމިނާގައި ތަފާތު ހަތަރު ދާއިރާއަކުން ދަރިވަރުންނަށް މަޢުލޫމާތު ދީފައިވެއެވެ. އެއީ ލީގަލް، އައިޓީ އަދި ސޮފްޓްވެއަރ އާއި ކަސްޓަމަރ ސަރވިސްގެ އިތުރުން ޑިވެލޮޕްމެންޓަލް ޕްލޭނިންގ އެވެ.
އެގޮތުން ޑިވެލޮޕްމެންޓް ސެކްޓަރ އާއި ގުޅޭގޮތުން ސެމިނާގެ ބައިވެރިންނަށް މަޢުލޫމާތު ދެއްވީ ޔޫއެންޑީޕީ މޯލްޑިވްސްގެ ޕްރޮގްރާމް އެނެލިސްޓް، އަހްމަދު މުހައްމަދު ޝިހާބު އެވެ. މީގެ އިތުރުން ޤާނޫނީ ދާއިރާއިން ވާހަކަދެއްކެވީ ވަކީލާ މަރިޔަމް ޝުނާނާ ކަމުގައިވާއިރު، އައިޓީ އަދި ސޮފްޓްވެއަރ ދާއިރާއާއި ގުޅޭގޮތުން މަޢުލޫމާތު ދެއްވީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)ގެ ސޮފްޓްވެއަރ ޑިވިޝަންގެ ސީނިއަރ ޑައިރެކްޓަރ، ނަހްޝަލް މުހައްމަދު އެވެ. އަދި ކަސްޓަމަރ ސަރވިސް އާއި ގުޅޭގޮތުން ބައިވެރިންނާއި މުޚާތަބުކުރެއްވީ ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ)ގެ ކަސްޓަމަރ ސަރވިސް މެނޭޖަރ، ފާތިމަތު ރަޝާ އެވެ.
އެއް ދުވަހުގެ މުއްދަތަށް ކުރިއަށްގެންދިޔަ މި ޕްރޮގްރާމަކީ ޕާތު އިން މިހާތަނަށް ބޭއްވި އެންމެ ފުރަތަމަ ޙަރަކާތެވެ.