ރޭ ދަންވަރު 00:30 ހާ އިރު ހައިވޭގައި އެކްސިޑެންޓެއް ހިނގައި، ހަތަރު މީހަކަށް އަނިޔާވެއްޖެއެވެ.
ފުލުހުން ބުނީ މިއެކްސިޑެންޓްގައި އަނިޔާވީ 22، 50 އަދި 54 އަހަރުގެ ތިން ފިރިހެނުންގެ އިތުރުން 21 އަހަރުގެ އަންހެނަކަށް ކަމަށެވެ. އޭގެ ތެރެއިން 22 އަދި 22 އަހަރުގެ ދެ މީހުން އެއް ސައިކަލުގައި ތިބި އިރު، ދެ ވަނަ ސައިކަލުގައި ތިބީ 50 އަދި 54 އަހަރުގެ ދެ މީހުން ކަމަށް ފުލުހުން ބުނެ އެވެ.
ހައިވޭގެ ހަތަރު ލޭން ހިމެނޭ ސަރަހައްދުން ދެ ސައިކަލު ޖެހިގެން ހިނގި މި އެކްސިޑެންޓުގައި ހަތަރު މީހުންގެ ގައިގެ އެކި ތަންތަނުން ހަން މަށައިގެންގޮސްފައިވާ ކަމަށާއި، ނަމަވެސް ބޮޑު އަނިޔާއެއް ލިބިފައި ނުވާ ކަމަށް ފުލުހުން ބުނެ އެވެ.
އެކްސިޑެންޓްގައި އަނިޔާވި 54 އަހަރުގެ މީހާ އަށް އައިޖީއެމްއެޗުގައި ފަރުވާދެމުން އަންނަ އިރު، ބާކީ ތިން މީހުންނަށް ފަރުވާދެމުން އަންނަނީ އޭޑީކޭ ހޮސްޕިޓަލުގައި ކަމަށް ފުލުހުން ބުނެ އެވެ.
ފަހަކަށް އައިސް ހައިވޭގައި ގިނަ އެކްސިޑެންޓު ތަކެއް ހިނގައި މީހުންނަށް ބޮޑެތި ހާނިކަ ވަމުން އަންނަ އިރު އެކްސިޑެންޓު ތައް މަދުކުރުމަށް ފުލުހުން އަންނަނީ މާލެ އަދި ހުޅުމާލޭގެ އެކި ސަރަހައްދުތަކުގައި ޗެކްޕޯސްޓް ޖަހައިގެން ވެހިކަލްތައް ފާސްކުރަމުންނެވެ.