ލ. ކައްދޫ އިން އެ އަތޮޅު މާމެންދޫ އަށް ދަތުރުކުރަމުން ދިޔަ ޑިންގީއެއް ބަންޑުން ޖަހާލައި ގެއްލުނު 19 އަހަރުގެ ޝިމާ ނާފިޒު ހޯދުމަށް ޑައިވިން ރޮބޮޓް ބޭނުން ކުރަން ފަށައިފި އެވެ.
އެމްއެންޑީއެފުން ބުނީ ޑައިވިން ރޮބޮޓްގެ އިތުރުން ކޯސްޓްގާޑް ޝިޕް ޝަހީދު އަލީ ވެސް ޒުވާނާ ހޯދުމުގެ މަސައްކަތް ކުރަމުން އަންނަ ކަމަށެވެ. އަދި އޭނާ ހޯދުމަށް ހެލިކޮޕްޓަރ ބޭނުންކޮށްގެން ވައިގެ މަގުން ބަލަމުން ދާއިރު ކޯސްޓްގާޑް ޑައިވިން ޓީމުން ވެސް ޑިންގީ ބަންޑުން ޖަހާލި ސަރަހައްދު ބަލަމުން އަންނަ ކަމަށެވެ.
ހުކުރު ދުވަހުގެ ރޭ 21:30 ހާއިރު ހިނގި މި ހާދިސާގައި ލޯންޗު ދުއްވަން އިން ފަރާތުން ވަނީ ފަތާފައި ގޮސް ކައިރީގައި އޮންނަ ސިކްސް ސެންސަސް ރިސޯޓަށް އަރާ ޑިންގީ ބަންޑުން ޖަހާލިކަމުގެ މައުލޫމާތު ދީފައެވެ.
އެނގިފައިވާ ގޮތުގައި ފިރިހެން މީހާ އެ ރިސޯޓަށް ފަތާފައި ދިޔައީ އަންހެން މީހާގެ އަތަށް ހަމަކާއި ފޯނެއް ވެސް ދިނުމަށްފަހު އޭގެ އެހީގައި އޮތުމަށް ބުނެފައެވެ.
ޝިމާ ގެއްލުނު މަޢުލޫމާތު ފުލުހުންނަށް ލިބުމާއި އެކު މާމެންދުއާއި ހިތަދޫގެ ދޯނިތަކާއި ސިކްސް ސެންސް ލާމު ރިސޯޓާއި އެމްއެންޑީއެފް ސެންޓްރަލް އޭރިއާގެ ސިފައިން ދަނީ އޭނާ ހޯދުމުގެ މަސައްކަތް ކުރަމުންނެވެ.