މަޖިލިސް އިންތިޚާބު ފެށުމުގެ ކުރިން އެމްއެމްޕީއާރްސީ ބޮޑު ޚިޔާނާތުގެ ތަހުގީގު ނިންމައި، ޚިޔާނާތުގެ ފައިސާ ލިބުނު ފަރުދުންގެ މައުލޫމާތު އާންމު ކުރުމަށް ސަރުކާރު ހިންގާ މައި ޕާޓީ، އެމްޑީޕީން އެދިއްޖެއެވެ.
އެމްޑީޕީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ޕާޓީގެ ފަރާތުން ދެއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ވިދާޅުވީ، މިހާރުވެސް އޭސީސީން މައްސަލަ ތަހުގީގު ކުރަމުން އަންނަކަން އިއުލާންކޮށްފައިވާ ކަމަށާއި، އެ ތަހުގީގު ވީހާވެސް އަވަހަށް ނިންމައި ދިނުމަށް އެދޭ ކަމަށެވެ.
އޭސީސީން ނެރުނު ތަހުގީގީ ރިޕޯޓުގައި އެމްއެމްޕީއާރްސީ ފައިސާ ޖަމާކުރި އެސްއޯއެފް ކުންފުނީގެ އެކައުންޓުން ރާއްޖޭގެ ބޮޑެތި ވިޔަފާރިތަކާ ޑޮލަރުގެ މުއާމަލާތްތައް ވަނީ ކޮށްފައެވެ. އޭގެ ތެރޭގައި ސިޔާސީ ފަރާތްތަކުގެ ހިއްސާ އޮންނަ ކުންފުނިތަކާއި ވިޔަފާރިތައް ވެސް ހިމެނެއެވެ.
ނަމަވެސް އޭސީސީން ވަނީ ކުރިން، 155 މީހަކަށް އެމްއެމްޕީއާރްސީ ޚިޔާނާތުގެ ފައިސާ ވަދެފައިވާ ކަމަށާއި އޭގެ ތެރޭގައި 19 ވަނަ މަޖިލީހުގެ ގިނަ މެމްބަރުންތަކެއްވެސް ހިމެނޭ ކަމަށް ބުނެފައެވެ.