އަންނަ އޭޕްރީލް މަހުގެ ތެރޭގައި މެޑިކަލް ކޮލެޖު ހުޅުވައި، އެތަނުގައި ކިޔަވައިދިނުން ފަށާނެ ކަމަށް ރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ބުނެފި އެވެ.
"ޕީއެސްއެމް ނިއުސް"ގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން އެމްއެންޔޫގެ ވައިސް ޗާންސެލަރ، ޑރ. ފަވާޒް ޝަރީފް ވިދާޅުވީ އޭޕްރީލް މަހު މެޑިކަލް ކޮލެޖުގެ ކިޔެވުން ފަށާނެ ކަމަށާއި، ކިޔަވައިދޭނީ ދަރުމަވަންތަ ހޮސްޕިޓަލުގައި މެޑިކަލް ކޮލެޖު ހިންގުމަށް ދީފައިވާ ދެ ފަންގިފިލާގައި ކަމަށެވެ. އެއީ އެ ހޮސްޕިޓަލްގެ 08 ވަނަ ފަންގިފިލާ އާއި 14 ވަނަ ފަންގިފިލާ އެވެ.
ޑރ. ފަވާޒް ވިދާޅުވީ ބޭނުންވާ ތާރިޚަށް ހުރިހާ ތައްޔާރީތަކެއްވެ ނުނިނުމު ކަމުގައިވިޔަސް، މިހާރު މެޑިސިން ކިޔެވުމަށް ބޭނުންކުރާ ވަސީލަތްތަކުގެ އެހީގައި ކުރިއަށްގެންދެވޭ ގޮތްތައް ހަމަޖެހިފައިވާ ކަމަށެވެ. އަދި އެމްއެންޔޫގެ ފެކަލްޓީ އޮފް ހެލްތު ސައިންސެސްގެ މެޑިކަލް ލެބް އަޕްގްރޭޑް ކުރެވިފައިވާ ކަމަށާއި، އެ ލެބްތައް ވެސް ކިޔެވުމުގައި ބޭނުން ކުރެވޭނެ ކަމަށް ޑރ. ފަވާޒު ވިދާޅުވިއެވެ.
ދަރުމަވަންތަ ހޮސްޕިޓަލްގައި ޤާއިމްކުރާ ރާއްޖޭގެ ފުރަތަމަ މެޑިކަލް ކޮލެޖުގައި ތިން ލެބޯޓްރީ އާއި ލެކްޗަރ ހޯލެއްގެ އިތުރުން ހަތަރު ޓިއުޓޯރިއަލް ކޮޓަރި އާއި ލައިބްރަރީއެއްވެސް ހުންނާނެ އެވެ. އެ ކޮލެޖުގައި ކިޔަވާ ދަރިވަރުން ޢަމަލީ ތަޖުރިބާ ހޯދުމަށް ހަމަޖެހިފައި ވަނީ އައިޖީއެމްއެޗް އިންނެވެ.
ރާއްޖޭގައި ބެޗްލަރ އޮފް މެޑިސިން އެންޑް ބެޗްލަރ އޮފް ސާޖަރީ (އެމް.ބީ.ބީ.އެސް) އަށް ފުރަތަމަ ކިޔަވައިދޭން ފަށާފައި ވަނީ މިދިޔަ އަހަރުގެ މެދުތެރޭގަ އެވެ. ނަމަވެސް އޭރު މެޑިކަލް ކޮލެޖު ނިމިފައިނުވާތީ، މެޑިސިން ކިޔަވައިދެމުން ދަނީ އެމްއެންޔޫ ކެމްޕަހުގަ އެވެ. މިހާރު ކުރިއަށްދާ އެ ކޯހުގައި ޖުމްލަ 22 ދަރިވަރަކު ކިޔަވައެވެ.
ފަސް އަހަރުގެ މުއްދަތަކަށް ހިންގާ އެމް.ބީ.ބީ.އެސް ކޯހުގެ ފީއަކީ އަހަރަކު 8،000 އެމެރިކާ ޑޮލަރެވެ. އެއީ 123،000ރ. އެވެ.
ސަރުކާރުން އިއުލާންކޮށްފައިވާ ފުރަތަމަ ޑިގްރީ އާއި ހަމައަށް ހިލޭ ކިޔެވުމުގެ ޕްރޮގްރާމްގެ ދަށުން ހިލޭ އެމް.ބީ.ބީ.އެސް ވެސް ކިޔެވޭނެ އެވެ. މި އަހަރުގެ ކޯހަށް ކުރިމަތިލާން ބޭނުންވާ ދަރިވަރުންނަށް އަންނަ މަހުގެ ތިން ވަނަ ދުވަހާއި ހަމައަށް އެ ފުރުސަތު ވަނީ ހުޅުވާލާފައެވެ.