ސައުދި އަރަބިއާއިން އެމެރިކާ އަށް ކަނޑައަޅުއްވާފައި ހުންނަވާ ސަފީރަކަށް ޕްރިންސެސް ރީމާ ބިންތި ބަންޑާރް އަލް ސައުދު އައްޔަންކޮށްފި އެވެ.
މިއީ ސައުދީން ބޭރު ޤައުމުގެ ސަފީރަކަށް އަންހެން ބޭފުޅަކު އައްޔަންކުރި ފުރަތަމަ ފަހަރެވެ.
މީގެ ކުރިން ސައުދީން އެމެރިކާއަށް ކަނޑައަޅުއްވާފައި ހުންނެވި ސަފީރަކީ ޕްރިންސް ޚާލިދު ބިން ސަލްމާން އެވެ. ޕްރިންސް ޚާލިދު ވަނީ މިއަދު ޑިފެންސް މިނިސްޓަރުގެ ނައިބުގެ މަޤާމަށް އައްޔަންކޮށްފަ އެވެ.
ޕްރިންސް ޚާލިދު އަކީ ކްރައުން ޕްރިންސް މުހައްމަދު ބިން ސަލްމާންގެ ކޮއްކޯފުޅެވެ. ކްރައުން ޕްރިންސް މުހައްމަދު އަކީ ސައުދީ ރަސްކަމުގެ ވާރުތަވެރިޔާ އަދި ޑިފެންސް މިނިސްޓަރުވެސް މެއެވެ.
ސައުދީން އެމެރިކާ އަށް އާ ސަފީރަކު ކަނޑައަޅުއްވާފައި މިވަނީ، މިދިޔަ އަހަރުގެ އޮކްޓޯބަރު މަހުގެ ތެރޭގައި ތުރުކީގެ ވެރިރަށް އިސްތާންބުލްގައި ހުންނަ ސައުދި ކޮންސިއުލޭޓް ތެރޭގައި 'ދަ ވޮޝިންގޓަން ޕޯސްޓް'ގެ ނޫސްވެރިޔާ ޖަމާލް ޚަޝޯޤީ މަރާލުމާއި ގުޅިގެން، ދެ ޤައުމުގެ ދެމެދުގައި މައްސަލަ ހޫނުވެފައިވާ ދަނޑިވަޅެއްގަ އެވެ.
ކޮންސިއުލޭޓް ތެރެއަށް ވަނުމަށްފަހު ވީނުވީއެއް ނޭނގި ޚަޝޯޤީ ގެއްލުނު މައްސަލާގައި އެއްވެސް ކަމެއް ނޭނގޭ ކަމަށް ބުނުމަށްފަހު، ސައުދީން ވަނީ ކޮންސިއުލޭޓް ތެރޭގައި ޚަޝޯޤީ މަރާލާފައިވާ ކަމަށް ފަހުން އިއުތިރާފްވެފަ އެވެ.