ދުނިޔޭގެ އެންމެ ބޮޑު ފިލްމީ އެވޯޑް ހަފްލާ ކަމަށްވާ އޮސްކާގެ އެންމެ މޮޅު އެކްޓަރުގެ މަގާމު އޮސްކާސް ރަމީ މަލިކް އަށް ލިބިއްޖެއެވެ.
އޭނާއަށް މި އެވޯޑު ލިބުނީ 'ބޮހީމިއަން ރަފްސޮޑީ' ގައި އޭނާ ކުޅުނު އާދަޔާ ޙިލާފު ރޯލަށެވެ.
މި އެވޯޑު ހާއްސަ ވެގެންދަނީ މިއީ އަރިބި ނަސްލެއްގެ މީހަކަށް އޮސްކާގެ އެންމެ މޮޅު އެކްޓަރުގެ މަގާމު ފުރަތަމަ ފަހަރަށް ވެގެން ދިޔުމުންނެވެ.
'ބޮހީމިޔަން ރަފްސޮޑީ' އަކީ 1900 ގެ އިނގިރޭސި ބޭންޑެއް ކަމަށްވާ ކުއީން ގެ އިސް ލަވަކިޔުންތެރިޔާ ފްރެޑީ މާކިއުރީގެ ހަޔާތުގެ މައްޗަށް ހަދާފައިވާ ފިލްމެކެވެ.
މާކިއުރީގެ ރޯލް ރަމީ ކުޅެފައިވާއިރު އޭނާ ދައްކައިދިން ހުނަރަށް ވަނީ އެތައް ބަޔެއްގެ ތައުރީފު ލިބިފައެވެ.
ބޮކްސް އޮފީހުގައި މި ފިލްމަށް ބޮޑު ކާމިޔާބީއެއް ލިބިގެންދިޔައިރު މި ފިލްމުން ރަމީ އަށް ވަނީ އިތުރު އެވޯޑްތަކެއް ވެސް މިއަހަރު ލިބިފައެވެ. އެގޮތުން ބަފްޓާ އެވާޑްސްގައި އެންމެ މޮޅު އެކްޓަރގެ އެވާޑްއާއި ސްކްރީން އެކްޓާސް ގިލްޑް އަދި ގޯލްޑެން ގްލޯބްސް ގައި އެންމެ މޮޅު އެކްޓަރުގެ އެވޯޑް ހިމެނެއެވެ.
ރަމީ އަށް ލިބުނު އެވޯޑްގެ އިތުރަށް "ބޮހީމިއަން ރެޕްސޮޑީ" އަށް ތިން އޮސްކާ ލިބުނެވެ.
ބޮހޭމިޔަން ރަފްސޮޑީގެ ކުރިން 37 އަހަރުގެ ރަމީ މަޝަހޫރު ވެފައިވަނީ ޓީވީ ސީރީސް ކަމަށްވާ 'ރޮބޮޓް' އިން ފެނިގެން ދިޔަ ރޯލުންނެވެ.
ރަމީ އަށް އެންމެ މޮޅު އެކްޓަރުގެ އެވޯޑު ލިބުމުން އޭނާ ވަނީ އޭނާގެ މަންމައާއި ބައްޕައަށް ޝުކުރުއަދާ ކޮށްފައެވެ. މީގެ އިތުރުން އޭނާއާއި އެކީ އެފިލްމުގައި މަސައްކަތް ކުރި އެންމެންނަށް ވެސް ޝުކުރުއަދާކޮށްފައެވެ.
ރަމީގެ އިތުރުން މި އެވޯޑް އަށް ނޮމިނޭޓް ވެފައި ވަނީ ބްރޭޑްލީ ކޫޕާ (އަ ސްޓާރ އިޒް ބޯން)، ކްރިސްޓަން ބޭލް (ވައިސް) ، ވިގޯ މޯޓެންސަން (ގްރީން ބުކް) އަދި ވިލިއަމް ޑެފޯ (އޭން އިޓާނިޓީސް ގޭޓް) އެވެ.