މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން، އައްޑޫ ސިޓީގައި ކުރިއަށްގެންދިޔަ ޓްރެފިކް އޮޕަރޭޝަންތަކުގައި 1098 އުޅަނދު ބަލައިފާސްކޮށްފިއެވެ.
މި މަހުގެ އެއްވަނަ ދުވަހު ފެށި މި އޮޕަރޭޝަންގެ ތެރެއިން ހިތަދޫ ޕޮލިސް ސްޓޭޝަނުން ކުރިއަށްގެންދިޔަ ޕްރޮގްރާމްގައި އެރަށުގައި ދުއްވާ 712 އުޅަނދު ބަލައިފާސްކޮށްފައިވާއިރު، އެއްގަމު އުޅަނދު ދުއްވުމުގެ ޤާނޫނާއި ޚިލާފްވުމުގެ ސަބަބުން 48 ފަރާތެއް ޖޫރިމަނާ ކޮށް ނަސޭހަތްތެރިވެފައިވާ ކަމަށް ފުލުހުން ބުނެއެވެ.
އަދި ގަން ޕޮލިސް ސްޓޭޝަނުން ކުރިއަށްގެންދިޔަ ޕްރޮގްރާމްގެ ތެރެއިން، އެރަށުގައި ދުއްވާ 376 އެއްގަމު އުޅަނދު ބަލައިފާސްކޮށްފައިވާއިރު، އެއްގަމު އުޅަނދު ދުއްވުމުގެ ޤާނޫނާއި ޚިލާފަށް އުޅަނދު ދުއްވި 36 ފަރާތެއް ޖޫރިމަނާކޮށް ނަސޭހަތްތެރިވެފައިވެއެވެ.
މީގެ އިތުރުން ހުޅުމީދޫ ޕޮލިސް ސްޓޭޝަނުން ކުރިއަށްގެންދިޔަ ޕްރޮގްރާމްގެ ތެރެއިން، އެރަށުގައި ދުއްވާ 10 އުޅަނދު ބަލައިފާސްކޮށް އެއްގަމު އުޅަނދު ދުއްވުމުގެ ޤަވާއިދާއި ޚިލާފުވެފައިވާ ތިން މީހަކު ޖޫރިމަނާ ކޮށް ނަސޭހަތްތެރިވެފައިވާ ކަމަށްވެސް ފުލުހުން ބުނެއެވެ.
ފުލުހުން ބުނީ ކުރިއަށް އޮތް ތަނުގައިވެސް އައްޑޫ ސިޓީގައި މި ޕްރޮގްރާމް ކުރިއަށް ގެންދާގޮތަށް ހަމަޖެހިފައިވާ ކަމަށެވެ.