ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގެ ސަލާމަތީ ކަންކަން ބެލެހެއްޓުން އިލެކްޝަންސް ކޮމިޝަން (އީސީ) އިން މޯލްޑިވްސް ޕޮލިސް ސަރވިސް އާއި ހަވާލުކޮށްފި އެވެ.
އެގޮތުން މިއަދު މެންދުރުފަހު އިލެކްޝަންސް ކޮމިޝަން (އީސީ)ގައި އެކަމަށްޓަކައި ބޭއްވި ރަސްމިއްޔާތުގައި އީސީގެ ފަރާތުން އެއްބަސްވުމުގައި ސޮއިކުރެއްވީ އެ ކޮމިޝަންގެ ރައީސް، އަހްމަދު ޝަރީފް އެވެ. އަދި ފުލުހުންގެ ފަރާތުން އެއްބަސްވުމުގައި ސޮއިކުރެއްވީ އެކްޓިންގ ކޮމިޝަނަރ އޮފް ޕޮލިސް، މުހައްމަދު ހަމީދު އެވެ.
އެއްބަސްވުމުގައި ސޮއިކުރެއްވުމަށްފަހު ދެއްކެވި ވާހަކަފުޅުގައި އީސީގެ ރައީސް އަހްމަދު ޝަރީފް ވިދާޅުވީ ކުރިން ބޭއްވި އިންތިޚާބުތަކުގައި ވެސް ފުލުހުންގެ އެއްބާރުލުން ލިބުނު ކަމަށާއި، ކުރިއަށް އޮތް މަޖިލިސް އިންތިޚާބުގައި ވެސް ފުލުހުންގެ އެއްބާރުލުމާއި އެހީތެރިކަން ލިބޭނެ ކަމަށް އުއްމީދުކުރައްވާ ކަމަށެވެ.
އަދި އޭސީޕީ މުހައްމަދު ހަމީދު ވިދާޅުވީ މަޖިލިސް އިންތިޚާބުގެ ސަލާމަތީ އޮޕަރޭޝަންތައް މިހާރު ވެސް ފަށާފައިވާ ކަމަށާއި، އެ އިންތިޚާބަކީ އެންމެންވެސް ހިތްހަމަޖެހޭ އަދި ރައްކާތެރި މާހައުލެއްގައި ނިމިގެންދާ އިންތިޚާބަކަށް ހެދުމަށް ކުރެވެން ހުރި ހުރިހާ މަސައްކަތެއް ފުލުހުން ކުރާނެ ކަމަށެވެ.
ރައްޔިތުންގެ މަޖިލީހުގެ އިންތިޚާބު އަންނަ އޭޕްރީލް މަހުގެ 06 ވަނަ ދުވަހު ބޭއްވުމަށް ނިންމާފައިވާއިރު، އެ އިންތިޚާބުގައި ވޯޓުލުމުގެ ޙައްޤު ލިބިގެންވާ މީހުންގެ އަދަދު 264،589 އަށް އަރައެވެ.