އައްޑޫ ސިޓީ ހިތަދޫގައި ރޭ ދަންވަރު ތޫނު އެއްޗަކުން ހަމަލާދީ އިންޑިއާ މީހަކު ޒަޚަމްކޮށްލާފައިވާ މައްސަލައިގައި ތިން މީހަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ މި މައްސަލައާއި ގުޅިގެން ކޯޓު އަމުރެއްގެ ދަށުން ހައްޔަރުކޮށްފައި ވަނީ އުމުރުން 18 އަހަރުގެ ފިރިހެނަކާއި، 24 އަހަރުގެ ދެ ފިރިހެނުން ކަމަށެވެ. ނަމަވެސް އެއީ ކޮން ޤައުމެއްގެ ބައެއްކަން ފުލުހުން ހާމަކޮށްފައެއް ނުވެއެވެ.
ރޭ ހިނގި މި މާރާމާރީގައި އަނިޔާވި އިންޑިއާ މީހާ އަށް ހިތަދޫ ރީޖަނަލް ހޮސްޕިޓަލްގައި ފަރުވާދެމުން އަންނަ އިރު، އޭނާގެ ހާލު ސީރިއަސް ކަމަށާއި، އިތުރު ފަރުވާއަށް މާލެ ގެންދިއުމަށް ޑޮކްޓަރު އިރުޝާދު ދީފައިވާކަމަށް އެޗްއާރްއެޗްގެ އިންފޮމޭޝަން އޮފިސަރ އަލީ މޫސާ ވިދާޅުވި އެވެ.
ބިދޭސީ މީހާއަށް ހިތަދޫ ރީޖަނަލް ހޮސްޕިޓަލްގެ އައިސީޔޫގައި ފަރުވާ ދެމުން އަންނައިރު އޭނާގެ ބޮލާއި، ލޮލަށް އަދި މޫނަށް ވަނީ ފުން ޒަހަމްތަކެވެއް ލިބިފައެވެ. އެގޮތުން އެ ހަމަލާގައި ބިދޭސީ މީހާގެ ކަނާއަތު ލޯވަނީ އެއްކޮށް ހަލާކުވެފައެވެ. އޭނާގެ ލޮލުގެ ފެނުން ގެއްލިފައިވާއިރު ހޮސްޕިޓަލަށް ގެންދިޔައިރުވެސް މީހާ އޮތީ ހޭނެތިފައެވެ.
ހޮސްޕިޓަލުން ބުނީ އޭނާގެ ބޮލަށް ލިބިފައިވާ ގެއްލުން އެނގޭނީ ސީޓީ ސްކޭން ހަދައިގެން ކަމަށެވެ
ޒަޚަމްކޮށްލި ބިދޭސީ މީހާއަކީ ހިތަދޫގައި އުޅޭތާ ގިނަ ދުވަސްވެފައިވާ މީހެކެވެ. އެނގިފައިވާ ގޮތުގައި އޭނާ ރާއްޖެ އެތެރެވެފައިވަނީ ހިތަދޫ މީހެއްގެ ނަމުގައެވެ.
މިހާދިސާ އާއި ގުޅިގެން އޭނާ އިތުރު ފަރުވާއަށް މާލެ ގެންދިއުމަށް ހޮސްޕިޓަލުން މިހާރުވަނީ އޭނާ ރާއްޖެ އެތެެރެ ކުރި ފަރާތަށް އަންގާފައެވެ. ނަމަވެސް އަދިވެސް އޭނާ ފުރުވާލެވޭ ގޮތް ހަމަޖެހިފައި ނުވެއެވެ.