ރައްޔިތުންގެ މަޖިލީހުގެ ބައެއް މެމްބަރުން ވޯޓުގައި ބައިވެރި ނުވަނީ ކަމެއް ފޮރުވުމުގެ މަޤްސަދުގައި ކަމަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެ އެވެ.
އީވާ މިހެން ވިދާޅުވީ މަޖިލީހުގެ ކޯރަމް ހަމަނުވުމުގެ ސަބަބުން މިއަދު ދައުލަތުގެ ފައިސާ އާއި މުދަލަށް ޚިޔާނާތްތެރިވުމުގެ މައްސަލަތައް ބެލުމަށް އުފައްދާފައިވާ ކޮމިޝަނާއި، ގޮތް ނޭނގޭ މަރުތަކުގެ މައްސަލަތައް ބެލުމަށް އުފައްދާފައިވާ ކޮމިޝަނަށް ބާރު ދޭ ބިލަށް ވޯޓަށް ނޭހުމުގެ ސަބަބުންނެވެ.
އެގޮތުން އީވާ ވިދާޅުވީ ކޯރަމް ހަމަނުވުމުގެ ސަބަބުން މި ބިލްތަކަށް ވޯޓަށް ނޭހުމަކީ ބަޔަކު ގަސްދުގައި، ކުރިން ހިނގާފައިވާ ކުށްތަކުގެ ޙަޤީޤަތް ފޮރުވުމަށާއި، އެކަން ހާމަވާން ބޭނުން ނުވާތީ ކުރާ ކަމެއް ކަމަށެވެ.
އީވާ މިހެން ވިދާޅުވިއިރިު، މިއަދުގެ ޖަލްސާގައި ވެސް އެ ދެ ކޮމިޝަނަށް ބާރުދޭ ބިލަށް ވޯޓަށް އެހޭގޮތް ނުވީ ކޯރަމް ހަމަނުވުމާ ގުޅިގެންނެވެ. މަޖިލީހުގެ ކޯރަމް ހަމަވާނީ 43 މެމްބަރުން ހަމަވުމުން ކަމަށްވާއިރު، މި ބިލަށް ވޯޓަށް އަހަން ބެލިއިރު މަޖިލީހުގެ ތަޅުމުގައި ތިއްބެވީ 42 މެމްބަރުންނެވެ.
ވޯޓަށް އެހޭ ވަރަށް މެމްބަރުން ހަމަނުވުމުން މަޖިލީހުގެ ރިޔާސަތުން ވަނީ މިއަދުގެ ޖަލްސާ ނިންމަވާލައްވާފައެވެ.
ދެ ކޮމިޝަންއަށް ބާރު ދިނުމުގެ ބިލު ހުށަހަޅީ މަޖިލީހުގެ ކުރީ ދައުރުގައި ކަމަށްވާއިރު، އެ ދައުރުގެ ފަހު ޖަލްސާއަށް ވެސް މި ބިލު ފާސްކުރުމަށް އެޖެންޑާ ކުރިއެވެ. ނަމަވެސް މަޖިލީހުގެ ކޯރަމް ހަމަނުވުމާ ގުޅިގެން އެ ބިލުތަކަށް އެ ދުވަހުގެ ޖަލްސާގައި ވެސް ވަނީ ވޯޓަށް އެހޭގޮތް ވަނީ ނުވެފައެވެ.
ދެ ކޮމިޝަނަށް ބާރުދޭ ބިލަށް ވޯޓަށް އެހޭގޮތް ނުވިއިރު، އެ ބާރުތަށް ނުލިބުމުގެ މަސައްކަތްތަކަށް ކޮންމެވެސް ވަރެއްގެ ލަސްތަކެއް އައިސްފައިވާ އެ ކޮމިޝަންތަކުން ވަނީ ބުނެފައެވެ.