މިދިޔަ އާދީއްތަ ދުވަހުގެ ރޭ ތޫނު އެއްޗަކުން ހަމަލާދިން އިންޑިޔާ މީހާގެ ހާލު ސީރިއަސް ކަމުން އެމްއެންޑީއެފްގެ ހެލިކޮޕްޓަރުގައި އޭނާ މާލެ ފޮނުވަން ތައްޔާރު ވެއްޖެއެވެ.
އެމްއެންޑީއެފްގެ އިންފޮމޭޝަން އޮފިސަރ، ކެޕްޓަން އިބްރާހިމް އާޒިމް ވިދާޅުވީ އެމީހާ މާލެ ގެނެވޭނެ ކަމަށް ބެލެވެނީ 9:30 އެހާކަށްހާއިރު ކަމަށެވެ.
ހިތަދޫގައި ހިންގި މިމާރާމާރީގައި އިންޑިޔާގެ އުމުރުން 46 އަހަރުގެ މީހަކަށް ހަމަލާ ދީފައިވަނީ ގްރޫޕަކުން ކަމަށް ޚަބަރު ލިބެއެވެ. އޭނާގެ މޫނަށް ބޮޑެތި ޒަޚަމްތަކެއް ވަނީ ލިބިފައެވެ.
ފުލުހުން ވަނީ މިމައްސަލައާ ގުޅިގެން ތިން މީހަކު މިހާތަނަށް ހައްޔަރުކޮށްފައެވެ. އެމީހުން ހައްޔަރުކުރީ ކޯޓު އަމުރެއްގެ ދަށުން ކަމަށް ފުލުހުން މައުލޫމާތު ދީފައިވެއެވެ. މައްސަލައިގެ ތަހުގީގު ކުރިއަށްދާތީ އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.