ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ ވެރިކަމުގެ ފުރަތަމަ ދުވަހު އެމަނިކުފާނު އުފެއްދެވި ރިޔާސީ ކަމިޝަންތަކަށް ދިނުމަށް ހުށައަޅާފައިވާ ބާރުތައް ދިނުމަށް އިދިކޮޮޅު މެމްބަރުން ތާއީދު ނުކުރަނީ، އެބާރުތައް ކޮމިޝަންތަކަށް ލިބިއްޖެނަމަ އިދިކޮޅު ކޯލިޝަނުން މަޖިލީހަށް ވާދަކުރާ ކެންޑިޑޭޓުން ހައްޔަރުކޮށްފާނެތީ ކަމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަދުރޭ ވަނީ ރިޔާސީ ކޮމިޝަނަށް ބާރު ލިބޭއިރަށް ޕްރޮގްރެސިވް ކޯލިޝަނުގެ ކެންޑިޑޭޓުންގެ މައްސަލަތައް ބަލަން ފަށައި، ކެންޑިޑޭޓުން ހައްޔަރުކޮށް އިންތިޚާބުގައި ވާދަނުކުރެވޭނެ ގޮތަށް ހަދާނެ ކަމަށް ތުހުމަތުކޮށްފައެވެ.
އަދުރޭ އިތުރަށް ވިދާޅުވީ، އެބޭފުޅުންގެ މަގުސަދަކީ އިދިކޮޅު ކެންޑިޑޭޓުން ޖަލަށް ލައި، އިންތިޚާބުގައި ވާދަނުކުރެވޭނެ ގޮތް ހެދުމަށް ފަހު އެމްޑީޕީއަށް މަޖިލީހުގެ މެޖޯރިޓީ ހޯދާދިނުމަށް ފަސޭހަކުރުން ކަމަށް ވެސް ވިދާޅުވެފައެވެ. އަދި ސަރުކާރު މެމްބަރުން އަވަސް އަރުވާލައިގެން އެބާރުތައް ދިނުމަށް މަސައްކަތް ކުރައްވަނީ ވެސް އެބޭނުމުގަިއ ކަމަށް އަދުރޭ ތުހުމަތު ކުރެއްވިއެވެ.
ސަރުކާރު މެމްބަރުން ވިދާޅުވަނީ ރިޔާސީ ކޮމިޝަންތަކަށް ބާރުދޭން ބޭނުން ނުވަނީ ކަންތައް ފޮރުވުމަށް ކަމަށެވެ. ދެފަހަރެއްގެ މަތިން ރިޔާސީ ކޮމިޝަންތަކަށް ބާރުދޭ ބިލަށް ވޯޓަށް އަހަން މަސައްކަތް ކޮށްފައިވާއިރު އިއްޔެ އެ މަސައްކަތް ނާކާމިޔާބުވީ ޖޮއިންޓް ޕާލަމެންޓްރީ ގްރޫޕުގެ މެމްބަރުން ވެސް މަޖިލީހަށް ހާޒިރުނުވުމުގެ ސަބަބުންނެވެ.
ޖޭޕީޖީ ލީޑަރ، ރިިޔާޒް ވިދާޅުވީ އެ މައްސަލަ ބަލައި ހާޒިރުނުވި މެމްބަރުންނަށް ފިޔަވަޅު އަޅާނެ ކަމަށެވެ. ނަމަވެސް އަދި އެއްވެސް ފިޔަވަޅެއް އަޅާފައިވާކަމެއް ހާމައެއް ނުކުރެއެވެ.