ޕްރައިމަރީއިން ނާކާމިޔާބުވާ ކެންޑިޑޭޓުންނަށް، އިންތިޚާބުގައި ވާދަކުރުމުގެ ފުރުސަތު ދިނުމަށް ސުޕްރީމް ކޯޓުން ކުރި ހުކުމާއި ގުޅިގެން ދިވެހި ރައްޔިތުންގެ ޑިމޮކްރެޓިކް ޕާޓީގެ އިސް އޮފިޝަލުން އިލެކްޝަންސް ކޮމިޝަނާ ބައްދަލުކޮށްފިއެވެ.
ކާށިދޫ ދާއިރާގެ ޕްރައިމަރީ އިން ނާކާމިޔާބުވި އެދާއިރާގެ ކުރީގެ މެމްބަރު އަބްދުﷲ ޖާބިރު އަދި ހިތަދޫ އުތުރު ދާއިރާގެ ޕްރައިމަރީން ނާކާމިޔާބުވި ސ. ހިތަދޫ ގުލްޒަހާރުގެ އަހުމަދު މުހައްމަދު ސުޕްރީމް ކޯޓަށް ހުށައެޅި މައްސަލަ ބެއްލެވުމަށް ފަހު ކޯޓުން ވަނީ ޕްރައިމަރީ އިން ނާކާމިޔާބުވިޔަސް އިންތިޚާބުގައި ވާދަކުރެވޭނެ ކަމަށް ކަނޑައަޅައި، ފަހު ބަސް އިއްވާފައެވެ.
އެމްޑީޕީން ވަނީ ސުޕްރީމް ކޯޓުގެ ހުކުމަކީ ސީދާ އެޕާޓީއަށް އަމާޒުކޮށް އިއްވި ހުކުމެއް ކަމަށް ބުނެފައެވެ. ސަބަބަކީ ޕްރައިމަރީއެއް ބާއްވާފައިވަނީ ހަމައެކަނި އެމްޑީޕީން ކަމަށާއި އެހެން ޕާޓީތަކުން ޕްރައިމަރީއެއް ނެތި ކެންޑިޑެސީ ހަވާލުކޮށްފައިވާ ކަން އެޕާޓީން ވަނީ ފާހަގަކޮށްފައެވެ.
ސުޕްރީމް ކޯޓަށް ހުށައެޅި މައްސަލާގައި ސިޔާސީ ޕާޓީތަކުގެ ގަވާއިދު އިސްލާހުކޮށް، ޕްރައިމަރީއެއްގައި ބައިވެރިވާ ފަރާތަކަށް ދެން އެ އިންތިޚާބުގައި ވާދަނުކުރެވޭނެ ކަމަށް ކަނޑައެޅުމަކީ ގާނޫނު އަސާސީއިން ލިބިފައިވާ ހައްގަކަށް އުނިކަމެއް ގެނެސްދޭ ކަމެއް ކަން ކޯޓުގައި ފާހަގަކޮށްފައިވެއެވެ.