އިނގިރޭސިވިލާތުގެ ހައްދުފަހަނަޅާފައިވާ އެކްޓިވިސްޓް، ޓޮމީ ރޮބިންސަން ފޭސްބުކް އާއި އިންސްޓަގްރާމް އިން ބޭންކޮށްފި އެވެ.
އޭނާ މި ދެ ސޯޝަލް މީޑިއާ ޕްލެޓްފޯމް އިން ބޭންކޮށްފައި ވަނީ ދެ މީޑިއާގެވެސް ކޮމިއުނިޓީ ސްޓޭންޑާޑްތަކާއި ޚިލާފުވުމުންނެވެ.
ރޮބިންސަންގެ އަސްލު ނަމަކީ ސްޓީފެން ޔެކްސްލީ-ލެނަން އެވެ. އޭނާ މި ދެ ޕްލެޓްފޯމް އިން ބޭރުކޮށްފައި ވަނީ އެންޓި-މުސްލިމް ޕޯސްޓްތައްކޮށް، ނަފްރަތު އުފައްދާ ފަރާތްތަކާއި ގްރޫޕްތަކާއި އެކު އޮފްލައިންކޮށް ވެސް މަސައްކަތްކުރުމުގެ ސަބަބުންނެވެ.
ފޭސްބުކް އިން ނެރުނު ބަޔާނެއްގައި ބުނެފައި ވަނީ ޓޮމީ ރޮބިންސަންގެ ފޭސްބުކް ޕޭޖު ވަނީ އެކި ފަހަރުގެ މަތިން އެ ޕްލެޓްފޯމްގެ ކޮމިއުނިޓީ ސްޓޭންޑާޑްތަކާއި ޚިލާފުވެ، ބޭއަދަބީ ބަހުރުވަ ބޭނުންކޮށް، މުސްލިމުންނަށް އަމާޒުކޮށްގެން ހަމަނުޖެހުން ހިންގުމަށް ގޮވާލާފައި ކަމަށެވެ.
ފޭސްބުކް އިން ބުނީ މީހުންގެ ދީނާއި ނަސްލުގެ މައްޗަށް ބިނާކޮށް ހަމަލާދޭ ފަރާތްތަކާއި ޖަމިއްޔާތަކަށް ފޭސްބުކް އަދި އިންސްޓަގްރާމްގައި އެއްވެސް ޖާގައެއް ނޯންނާނެ ކަމަށެވެ.
ފޭސްބުކް އިން ބުނީ ރޮބިންސަން ވަނީ މުސްލިމުންނާއި ދިމާލަށް ހަޑިހުތުރު ބަސް ބޭނުންކޮށް، މުސްލިމުންނާއި ދެކޮޅަށް ހަނގުރާމައަށް ނިކުތުމަށް މީހުންނަށް ގޮވާލައި، މީހުންނަށް ގަނާކުރާ މަންޒަރު ފެންނަ އެތައް ވީޑިއޯތަކެއް ޕޯސްޓްކޮށް، ފޭސްބުކްގެ ޕޮލިސީތަކާއި ޚިލާފުވެފައި ކަމަށެވެ.
ޓޮމީ ރޮބިންސަންގެ ފޭސްބުކް ޕޭޖުގައި އެއް މިލިއަނަށްވުރެ ގިނަ ފޮލޯވާސް އާއި ލައިކްސް ހުރިއިރު، އޭނާ އަށް އެންމެ ފަހުން ލިޔުމުން އިންޒާރުދީފައި ވަނީ ޖެނުއަރީ 24 ވަނަ ދުވަހު އެވެ.
ފޭސްބުކް އިން ވަނީ ކުރިއަށް އޮތް ތަނުގައި ވެސް ރޮބިންސަން އަށް އިންސްޓަގްރާމްގައި ރަސްމީ ޕޭޖެއް ހުޅުވުމުން މަނާކޮށްފަ އެވެ. އަދި ޓްވިޓާ އާއި ޕޭޕާލް އިން ވެސް ވަނީ މިދިޔަ އަހަރު ރޮބިންސަންގެ އެކައުންޓްތައް ބޭންކޮށްފައެވެ.