ވިޔަފާރި ފަށަން ބޭނުންވާ އަންހެނުންނަށް ޚާއްސަކޮށްގެން އައްޑޫ ސިޓީގައި ވޯކްޝޮޕެއް ބާއްވަން ޖޫނިއަރ ޗެމްބަރ އިންޓަނޭޝަނަލް (ޖޭސީއައި) މޯލްޑިވްސް އިން ނިންމައިފި އެވެ.
ޖޭސީއައި އިން ބުނީ މި ވޯކްޝޮޕަކީ އުމުރުން 18 އަހަރާއި 35 އަހަރާއި ދެމެދުގެ މިހާރުވެސް ވިޔަފާރިކުރަމުންދާ އަދި މުސްތަޤްބަލުގައި ވިޔަފާރިއެއް ފަށަން ބޭނުންވާ ފަރާތްތަކަށާއި، އޭ ލެވެލްގެ ދަސްވެނިންނާއި ޔުނިވާސިޓީ ދަރިވަރުންނަށް އަމާޒުކޮށްގެން ބާއްވާ ވޯކްޝޮޕެއް ކަމަށެވެ. މި ވޯކްޝޮޕް ބާއްވަން ހަމަޖެހިފައި ވަނީ އަންނަ މާޗު މަހުގެ 01 އިން 02 އަށެވެ.
ޖޭސީއައި އިން ބުނީ އޮންލައިން ވިޔަފާރިއެއް ފަށަން ބޭނުންވާ ފަރާތްތަކަށްވެސް މި ވޯކްޝޮޕްގައި ބައިވެރިވެވޭނެ ކަމަށެވެ.
މި ވޯކްޝޮޕްގެ މަޤްސަދަކީ ވިޔަފާރި ފެށުމުގައި އަންހެނުންނަށް ދިމާވާ ގޮންޖެހުންތައް ދެނެގަތުން ކަމުގައި ޖޭސީއައި އިން ބުނެއެވެ.
ކުރިއަށް އޮތް ހަފްތާ ބަންދުގައި ބާއްވާ މި ވޯކްޝޮޕްގައި ސެޝަންތައް ނަގައިދޭނީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އާއި މޯލްޑިވްސް އިސްލާމިކް ބޭންކް (އެމްއައިބީ) އަދި ބޭންކް އޮފް މޯލްޑިވްސް (ބީއެމްއެލް)ގެ ބިޒްނަސް ސެންޓަރުގައި މަސައްކަތްކުރާ ފަރާތްތަކެވެ.
މި ވޯކްޝޮޕްގައި ބައިވެރިވުމަށް 7740938 އަދި 9995467 ފޯނަށް ގުޅައިގެން ރަޖިސްޓްރީ ކުރެވޭނެ އެވެ.
