އިންޑިއާ އިން ރާއްޖެ އައި ދިވެއްސެއްގެ އަތުން ގިނަ އަދަދެއްގެ މަސްތުވާތަކެތި އަތުލައިގެންފި އެވެ.
މޯލްޑިވްސް ކަސްޓަމްސް ސަރވިސް އިން ބުނީ އިންޑިއާ އިން ރާއްޖެ އައި އުމުރުން 24 އަހަރުގެ ފިރިހެނެއްގެ އަތުން 02 ކިލޯގެ މަސްތުވާކެތި އަތުލައިގެންފައިވާ ކަމަށެވެ.
އަދި އެ މަސްތުވާތަކެތި އަތުލައިގެންފައި ވަނީ މި މަހުގެ 20 ވަނަ ދުވަހު ރާއްޖެ އައި އެ މީހާގެ ޢަމަލުތައް ހުރިގޮތުން އޭނާއާ މެދު ޝައްކުކުރެވިގެން ބަލާފާސްކުރުމުން ކަމަށާއި، އެ މީހާގެ ލަގެޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ރައްކާކޮށްފައިހުރި ޕެކެޓެއްގައި މުށި ކުލައިގެ ދިޔާތަކެތި ފެނިފައިވާ ކަމަށެވެ.
ކަސްޓަމްސް އިން ބުނީ އެތަކެތި އިތުރަށް ތަހުލީލުކުރުމުން، މަސްތުވާކެތީގެ ބާވަތެއް ކަމުގައިވާ ހަޝިޝް އޮއިލް އަށް ޕޮޒިޓިވް ވެފައިވާ ކަމަށެވެ.
އަދި މި މައްސަލައިގައި ޝާމިލުވާ މީހާއާއި، އަތުލައިގަނެވުނު މަސްތުވާތަކެތި މިހާރު މޯލްޑިވްސް ޕޮލިސް ސަރވިސް އާއި ހަވާލުކޮށްފައިވާ ކަމަށާއި، ފުލުހުން މި މައްސަލަ އިތުރަށް ތަޙުޤީޤުކުރަމުންދާ ކަމަށްވެސް ކަސްޓަމްސް އިން ބުނެއެވެ.