އިންޑިއާއިން އަންގާރަ ދުވަހު ޕާކިސްތާނުގެ އެއާފޯސް ޓްރެއިނިންގ ސެންޓަރަކަށް ހަމަލާ ދިނުމާއި ގުޅިގެން އެ ގައުމުގެ ފިލްމުތަކާއި އިޝްތިހާރުތައް ޕާކިސްތާނުގައި މީހެ ފަހުން ނުދެއްކުމަށް އެ ގައުމުން ނިންމައިފިއެވެ.
ކަޝްމީރުގެ ޕުލްވާމާއަށް ދެވުނު ޓެރަރިސްޓް ހަމަލާއަށް ފަހު މި ދެގައުމުގެ ދެމެދުގައި ވަނީ ވަރަށް ބޮޑަށް މައްސަލަ ގޯސްވެފައެވެ. އިންޑިއާއިން ވަނީ ޕާކިސްތާނުގެ ލަވަކިޔުންތެރިންނާއި ފިލްމީ ތަރިން އެ މީހުންގެ ފިލްމުތަކުގައި ބޭނުން ނުކުރުމަށް ނިންމާފައެވެ.
ޕާކިސްތާނުން ބުނެފައިވަނީ އިންޑިއާއިން ހަމަލާއެއް ދީފިނަމަ މިފަހަރު ބަލަން ނުތިބޭނެ ކަމަށެވެ. އިންޑިއާގެ ހަމަލާއަށްފަހު ޕާކިސްތާނުން ދެން ނަގާނީ ކޮންފިޔަވަޅެއްތޯ އެއީ އެންމެންގެ ހިތުގައި ވެސް އުފެދޭ ސުވާލެކެވެ.
ޕާކިސްތާނުގެ އިންފޮމޭޝަން އެންޑް ބްރޯޑްކާސްޓިންގ މިނިސްޓަރ ޗޯދުރީ ފަވާދު ހުސައިން ވަނީ އެ ގައުމުގެ ފިލްމު އެސޯސިއޭޝަނުން އިންޑިއާގެ ފިލްމުތައް ބޮއިކޮޓް ކުރަން ނިންމާފައިވާ ކަމަށް ވިދާޅުވެފައެވެ.