ޕްރިމިއާ ލީގުގެ ލެސްޓާ ސިޓީ ފުޓުބޯޅަ ކުލަބުގެ އާ މެނޭޖަރު ކަމަށް ކުރީގެ ލިވަޕޫލްގެ ކޯޗު ބްރެންޑަން ރޮޖާސް ހަމަޖައްސައިފިއެވެ.
ސްކޮޓްލޭންޑު ލީގުގައި ރަސްކަން ކުރަމުން އަންނަ ސެލްޓިކަށް 7 ތަށި ކާމިޔާބުކޮށް އިތުރު ގިނަގުނަ ކާމިޔާބީތަކެއް ހޯދަދިން ރޮޖާސް ވަނީ އިއްޔެ ލެސްޓާއަށް ބަދަލުވެ، ރޭ ލެސްޓާ ބްރައިޓަންއާ ދެކޮޅަށް ކުޅުނު މެޗު ބަލާލަން ގޮސްފައެވެ. ލެސްޓާ ވަނީ 1-2 އިން އެ މެޗު ކާމިޔާބުވެސް ކޮށްފައެވެ.
ލެސްޓާ ކޯޗުކަމުން ކްލޯޑް ޕުއެލް ވަކިކުރުމަށް ފަހު ރޮޖާސް ގެންނަން އުޅޭ ކަމުގެ އަޑުތައް ވަނީ ގަދަވެފައެވެ. ނަމަވެސް ރޮޖާސް ވަނީ ފުރަތަމަ އެވާހަކަތައް ދޮގުކޮށްފައެވެ.
ސެލްޓިކުން އިއްޔެ ވަނީ ލެސްޓާއިން ރޮޖާސްއާ ގުޅޭގޮތުން މަޝްވަރާ ކުރުމަށް އެދިފައިވާކަން އިއުލާންކޮށްފައެވެ. ކުއްލި ގޮތަކަށް ލެސްޓާއަށް އޭނާ ބަދަލުވުމުން ސެލްޓިކްގެ ގިނަ ސަޕޯޓަރުން ވަނީ އޭނާއަށް ވަރަށް ބޮޑަށް ފާޑުކިޔައި ނުރުހުން ފާޅުކޮށްފައެވެ.