ރާއްޖޭގެ ދެކުނަށް މިހާރު ކުރަމުންދާ ވިއްސާރާގައި ފެންވަދެ، ނޫޅެވޭވަރުވެފައިވާ އަށް ގެއެކުން މީހުން ބަދަލުކޮށް ވަގުތީ ބޯހިޔާވަހިކަން އަށް އާއިލާއަކަށް ފޯރުކޮށްދެމުން އަންނަ ކަމަށް ޑިޒާސްޓާ މެނޭޖްމަންޓުން ބުނެފިއެވެ.
ލާމު އަތޮޅާއި ގދ. އަތޮޅަށް އެންމެ ބޮޑަށް ވިއްސާރައިގެ އަސަރު ކޮށްފައިވާއިރު ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް ކުރަމުން އަންނަނީ ލ. އިސްދޫ އަށް ގެއެއްގެ އާއިލާތަކަށެވެ. އެއާއިލާތަކުގެ ރައްޔިތުންގެ ދިރިއުޅޭނެ ތަނެއް ހަމަޖެއްސުމުގެ މަސައްކަތް ކުރަމުން އަންނަނީ ރަށު ކައުންސިލުންނެވެ.
ވިއްސާރައިގެ މައުލޫމާތު ފޯރުކޮށްދިނުމަށް ޑިޒާސްޓާ މެނޭޖްމަންޓުން ބޭއްވި ބައްދަލުވުމުގައި ސީއީއޯ، އިހުސާން ހަސަން ވިދާޅުވީ، މިހާތަނަށް ވިއްސާރާގައި 98 ގެއަކަށް ފެނުގެ އަސަރުކޮށްފައިވާ ކަމަށެވެ. އެމްއެންޑީއެފުން އަންނަނީ ފެނުގެ އަސަރުކުރި ގެތަކަށް ވެލި ބަސްތާ ޖަހައިދިނުމާއި ފެން ހިއްކުމުގައި އެހީތެރިކަން ފޯރުކޮށްދެމުންނެވެ.
އެންމެ ބޮޑަށް ވިއްސާރައިގެ އަސަރު ކޮށްފައިވަނީ ލ. އަދި ގދ. އަތޮޅަށެވެ. މިއަދުވެސް ދެކުނުގެ އަތޮޅުތަކަށް ވިއްސާރަ ކުރާނެ ކަމަށް މޫސުމާ ބެހޭ އިދާރާއިން ލަފާ ކުރެއެވެ.