ބިރުވެރި ފިލްމް"ސްތްރީ" އިން އެވޯޑްތައް ހާސިލްކޮށްފައިވާ ބަތަލު ރާޖް ކުމާރު ރާއޯ އަނެއްކާ ވެސް އެޒާތުގެ ފިލްމެއް ކަމަށްވާ "ރޫހް-އާފްޒާ" ކުޅުމަށް ތައްޔާރުވެއްޖެއެވެ.
ދިނޭޝް އަދި މްރިގްދީޕް ލާމްބާ ޕްރޮޑިއުސް ކުރާ މި ފިލްމުގައި ރާޖް ކުމާރު ފެނިގެންދާނީ ކުޑަކޮށް ސޭކު މީހެއްގެ ރޯލުން ކަމަށް ނޫސްތަކުން ރިޕޯޓް ކުރެއެވެ.
މި ފިލްމުގެ އަންހެން ލީޑް ރޯލުން ފެންނާނެ ފަރާތަކާއި އަދި ޑައިރެކްޓަރު ދާދި އަވަހަށް ފައިނަލް ވެގެންދާނެއެވެ. މި ފިލްމު އަމާޒުކޮށްފައިވަނީ އުއްތަރުޕްރަދޭޝްގެ މޮރާދުއާބާދުގެ ފްލޯކު ވާހަކައެއްގެ މައްޗަށް ކަމަށްވެއެވެ. ބުނެވޭ ގޮތުން އެ އަވަށުގައި ކޮންމެ ކައިވެންޏަކަށް ފަހު ކައިވެނީގެ ފުރަތަމަ ރޭ ފިރިހެންމީހާ ފަތިސްވަންދެން ހޭލާ ބަހައްޓަން ޖެހެއެވެ. ފިރިހެންމީހާ ނިދިއްޖެނަމަ ފުރޭތަ އައިސް އަންހެންމީހާއާއި އަވަލަވާ އެމީހުންގެ ޒަވާޖީ ހަޔާތް ބަރުބާދުކޮށްލައެވެ.
މިކަހަލަ ފުލޯކު ވާހަކަތަކަށް ހެދޭ ބިރުވެރި ފިލްމުތަކަށް އިންޑިއާގެ އިތުރުން ގިނަ ބައެއްގެ ސަޕޯޓް ލިބެމުން ދެއެވެ. ފަހަކަށް އައިސް ބިރުވެރި ފިލްމުތައް މަދުވެ އެކްޝަން ފިލްމުތައް ވަނީ ގިނަވެފައެވެ. މިއީ އަނެއްކާވެސް މިފަދަ ފިލްމުތަކަށް ލޯބިކުރާ ފަރާތްތަކަށް ލިބޭނެ އުފާވެރި ޚަބަރަކަށް ވެގެންދާނެއެވެ.