ރާއްޖޭގެ ޝަރުއީ ކޯޓުތަކުގައި ތިއްބެވި ފަނޑިޔާރުންނަށް އަމާޒުކޮށް ހަގީގަތެއް ނެތް ވާހަކަދެއްކުން ހުއްޓާލަންޖެހޭ ކަމަށް ކުރީގެ ނައިބު ރައީސް ޑރ.މުހައްމަދު ޖަމީލު ވިދާޅުވެއްޖެއެވެ.
މިއަދު ސުޕްރީމް ކޯޓުގެ ބޭރުގައި ހުންނަވައިގެން ވާހަކަދައްކަވަމުން ޖަމީލު ވިދާޅުވީ ރާއްޖޭގެ އެކިއެކި ދާއިރާތައް އިސްލާހު ކުރުމުގެ ވާހަކަދެއްކުމަކީ ރަނގަޅު ކަމެއް ކަމަށާއި އެކަމަށް ތާއީދު ވެސް ކުރައްވާ ކަމަށެވެ. އަދި ރާއްޖޭގެ ޝަރުއީ ނިޒާމު އިތުރަށް ހަރުދަނާވެގެން ދިޔުމަށް ވެސް އެދޭ ކަމަށާއި ނަމަވެސް ހަގީގަތާ ހިލާފު ވާހަކަތައް ދެއްކުން ހުއްޓާލަންޖެހޭ ކަމަށް ޖަމީލު ވިދާޅުވިއެވެ.
"އަޅުގަނޑުގެ އިލްތިމާސަކީ، ޝަރުއީ ނިޒާމަށް އަމާޒުކޮށްގެން ވިޔަސް އަދި ފަނޑިޔާރުގެ އަށް އަމާޒުކޮށްގެން ވިޔަސް، ފަނޑިޔާރުންނަށް އަމާޒުކޮށްގެން ވިޔަސް ހަގީގަތެއް ނެތް ވާހަކަތަކުން އެއްކިބާވާން އެބަޖެހޭ" ޖަމީލު ވިދާޅުވިއެވެ.
މިއަދު އިސްލާހު ކުރަންޖެހިފައިވަނީ މުޅި ގައުމުގެ ނިޒާމު ކަމަށާއި އެގޮތުން ޝަރުއީ ނިޒާމުގެ އިތުރުން ރައްޔިތުންގެ މަޖިލީހުގެ ހާލަތާއި މިނިވަން މުއައްސަސާތަކުގެ ހާލަތާއި އަދި ގައުމުގައި ހުރި އެހެނިހެން ދާއިރާތަކުގެ ހާލަތާ ދޭތެރޭ ވެސް މިއަދު ވާހަކަދައްކަންޖެހޭ ކަމަށްވެސް ޖަމީލު ވިދާޅުވިއެވެ.
ޖަމީލު ވިދާޅުވި ގޮތުގައި ޝަރުއީ ނިޒާމު އިސްލާހު ކުރުމަށްޓަކާ ހުރިހާ ފަރާތްތަކަކުން ވެސް އިހުލާސްތެރި މަސައްކަތްތަކެއް ކުރަންޖެހޭ ކަމަށެވެ. އެގޮތުން ޝަރުއީ ނިޒާމު އިސްލާހު ކުރުމުގެ ގޮތުން ކަންތައްތަކެއް ފާހަގަކޮށް އެކަންކަމާ މެދު މަޝްވަރާކޮށް ރާއްޖެ އާއި ރާއްޖެއިން ބޭރުން ކަމާބެހޭ މާހިރުން ގެނެސްގެން އެ މަސައްކަތް ކުރަންޖެހޭ ކަމަށްވެސް ޖަމީލު ވިދާޅުވިއެވެ.
"މިވަގުތު އަޅުގަނޑުމެން ޖެހެނީ ހިތްވަރު ދޭންށޭ. އެ ބޭފުޅުންނަށް ބޭނުންވާ ކަންތައްތައް ފާހަގަކޮށް އެކަމަށްޓަކާ އެހީތެރިވެދޭންށޭ. އަޅުގަނޑުމެން ޖެހެނީ ޒިންމާދާރު ގޮތެއްގައި އެ ވާހަކަދައްކަންށޭ. އެއީ އަޅުގަނޑުގެ ވަރަށް ބޮޑު އިލްތިމާސެއް" ޖަމީލު ވިދާޅުވިއެވެ.