އިންޑިއާ އިން މަޝްވަރާގެ މޭޒަށް އައުމަށް ޕާކިސްތާނުގެ ބޮޑުވަޒީރު އިމްރާން ޚާން އަނެއްކާވެސް ގޮވާލައްވައިފި އެވެ.
ޕާކިސްތާން އެއާ ފޯސް (ޕީއޭއެފް) އިން ޕާކިސްތާންގެ ވައިގެ ސަރަޙައްދުގައި ތިބި އިންޑިއާގެ އަސްކަރިއްޔާގެ ދެ ބޯޓެއް ވައްޓާލުމާއި ގުޅިގެން ޤައުމާއި މުޚާތަބުކުރައްވައި ދެއްކެވި ވާހަކަފުޅުގައި އިމްރާން ވިދާޅުވީ، ޕުލްވާމާ އަށް ދިން ޓެރަރިސްޓް ހަމަލާ އާއި ގުޅިގެން އިންޑިއާއިން ކުރަން ބޭނުންވާ ތަޙުޤީޤުތަކަށް އެއްބާރުލުން ދޭނެ ކަމަށް ޕާކިސްތާނުން ބުނެފައިވާ ކަމަށެވެ.
"ޕުލްވާމާ ހާދިސާގައި މަރުވި މީހުންގެ އާއިލާތަކަށް ކުރެވުނު އިހުސާސްތައް އަޅުގަނޑުމެންނަށް އެނގޭ. އަޅުގަނޑުމެންވަނީ އެތައް އަހަރުތަކެއް ވަންދެން ހަނގުރާމައިގެ ޝިކާރައަކަށް ވެފައި. ބޮމުގެ ހަމަލާތަކުގައި ސަލާމަތްވި މީހުންނާއި، އަނިޔާވެ ނުކުޅެދިފައިވާ މީހުންނާއި އަޅުގަނޑު ހޮސްޕިޓަލްތަކަށް ގޮސް ބައްދަލުކުރިން. އަޅުގަނޑުމެންނަށް އިނގޭ ހަނގުރާމައިގެ މާނަ. ފެށުނީއްސުރެ އަޅުގަނޑުމެން ވަނީ ޢަމަލުކުރެވޭނެ ހެކި ދެއްކުމަށް އިންޑިއާ ކައިރިން އަހާފައި. އަސްކަރީ ބޭނުމަށް އެ މަޢުލޫމާތު ބޭނުންކުރުމަކީ އެއްގޮތަކަށްވެސް ޕާކިސްތާނުން ބޭނުންވާ ކަމެއް ނޫން"، އިމްރާން ވިދާޅުވި އެވެ.
"އެހެންނަމަވެސް އިންޑިއާ އިން މި މައްސަލަ ބޮޑުކުރާނެ ކަމަށް އަޅުގަނޑަށް ލަފާކުރެވުނު. އެހެންކަމުން އިންޑިއާ އިން ވެސް ހަނގުރާމައިގެ ކުޅިވަރުތައް ކުޅޭނަމަ، ޕާކިސްތާނުންވެސް ރައްދުދޭނެ ކަމަށް އަޅުގަނޑު ދެންނެވިން. އަޅުގަނޑުމެން އިންތިޒާރުކުރިން އަދި އެއަށްފަހު މިއަދު ޢަމަލުކުރީ"، އިމްރާން ވިދާޅުވި އެވެ.
އިތުރަށް ވާހަކަފުޅުދައްކަވަމުން އިމްރާން ވިދާޅުވީ އެއްވެސް ބަޔަކަށް އަނިޔާއެއް ނުވަތަ ގެއްލުމެއް ނުދިނުމަށް ޕާކިސްތާނުން ރޭވި ކަމަށާއި، ހަމަލާދިނީ ހަމައެކަނި ޤާބިލިއްޔަތުކަން ދައްކަން ކަމަށެވެ.
އިންޑިއާގެ އަސްކަރިއްޔާގެ ދެ ބޯޓެއް ޕާކިސްތާނުގެ ބޯޑަރު ހުރަސްކޮށްފައިވާ ކަމަށާއި، އެ ބޯޓުތައް ވައްޓާލައިފާ ކަމަށާއި އަދި ޕައިލެޓް ހައްޔަރުކޮށްފައިވާ ކަމަށްވެސް އިމްރާން ވިދާޅުވި އެވެ.
އިމްރާން ވިދާޅުވީ ރަނގަޅަށް ވިސްނައި، ހަމަޖެހުން ގެނައުމަށް އިންޑިއާ އަށް ގޮވާލައްވާ ކަމަށެވެ. ދުނިޔޭގައި މިހާތަނަށް ހިނގި ހުރިހާ ހަނގުރާމަތަކެއްވެސް ފަށާފައި ވަނީ ވަގުތާއި އިންސާނުންގެ ފުރާނައަށް ނުވިސްނައި ކަމަށާއި، މިއީ ފުރަތަމަ އަދި ދެވަނަ ބޮޑު ހަނގުރާމަ އާއި، ވިއެޓްނާމްގެ ހަނގުރާމައިގައި ވެސް ކަންތައް ހިނގި ގޮތް ކަމަށެވެ.
ދެ ޤައުމުގެ ވެސް ހަތިޔާރާއި ޤާބިލުކަމަށް ބަލައި، އެފަދަ ހަނގުރާމައަކަށް ޖާގަދެވެން އެބައޮތްތޯ އިމްރާން ވަނީ ސުވާލު އުފައްދަވާފައެވެ. އަދި ހަނގުރާމައެއް ފެށިއްޖެނަމަ، އޭގެ ކޮންޓްރޯލް އިންޑިއާގެ ބޮޑުވަޒީރު ނަރޭންދްރަ މޯދީ އާއި އޭނަގެ އަތުގައި ވެސް ނޯންނާނެ ކަމަށް އިމްރާން ވިދާޅުވި އެވެ.
"އަޅުގަނޑުމެން ބޭނުންވަނީ މަޝްވަރާގެ މޭޒަށް އައިސް، ދެ ޤައުމަށްވެސް އަސަރުކުރާ ޓެރަރިޒަމް އާއި ގުޅޭގޮތުން ވާހަކަދައްކަން. އަޅުގަނޑުމެން މިތިބީ ތައްޔާރަށް"، އިމްރާން ވިދާޅުވި އެވެ.