މިއަދު ޕާކިސްތާނުގެ އަސްކަރިއްޔާއިން ހައްޔަރުކުރި އިންޑިއަން އެއާ ފޯސް (އައިއޭއެފް)ގެ އޮފިސަރ، ވިންގް ކޮމާންޑަރ އަބިނަންދަން، ޕާކިސްތާނުގެ އަސްކަރިއްޔާގެ އޮފިޝަލުންނާއި ވާހަކަދައްކާ މަންޒަރު ފެންނަ ވީޑިއޯ އާންމުވެއްޖެ އެވެ.
އިންޓަ-ސަރވިސެސް ޕަބްލިކް ރިލޭޝަންސް (އައިއެސްޕީއާރް) އިން މިއަދު ހަވީރު ނެރުނު ވީޑިއޯގައި އަބިނަންދަން ބުނާ ގޮތުގައި އޭނާއާމެދު ޕާކިސްތާނުން ކަންތައް ކުރަނީ ވަރަށް ރަނގަޅަށް ކަމަށެވެ.
ވިންގް ކޮމާންޑަރ އަބިނަންދަންގެ މިގް 21 ބަައިސަން އެއާކްރާފްޓް، ލައިން އޮފް ކޮންޓްރޯލް އާއި ޚިލާފުވުމުގެ ސަބަބުން މިއަދު ޕާކިސްތާނުން ވަނީ ވައްޓާލާފައެވެ. އަބިނަންދަންގެ އެއާކްރާފްޓާއެކު އިންޑިއާގެ އަސްކަރިއްޔާގެ އިތުރު ބޯޓެއްވެސް ޕާކިސްތާނުން ވަނީ ވައްޓާލާފައެވެ. އެ ބޯޓު ވެއްޓުނީ އިންޑިއާ ސަރަޙައްދަށް ކަމުގައިވާއިރު، އަބިނަންދަންގެ ބޯޓު ވެއްޓުނީ ޕާކިސްތާނުގެ ސަރަޙައްދަށެވެ.
އާޒާދް ކަޝްމީރްގެ އާންމު ރައްޔިތުން ވަނީ އޭނާ ހައްޔަރުކޮށް، ޕާކިސްތާންގެ ސިފައިންނާއި އޭނާ ހަވާލުކޮށްފަ އެވެ. އޭނާ ހައްޔަރުކުރި މަންޒަރު ދައްކާ ވީޑިއޯތަކުން ފެންނަ ގޮތުގައި ރުޅިގަދަ ރައްޔިތުންގެ ކިބައިން އޭނާ ސަލާމަތްކުރުމަށް ސިފައިންނާއި އަސްކަރިއްޔާގެ އޮފިޝަލުން ގަދަކަމުން މަސައްކަތްކުރެއެވެ.
ޕާކިސްތާންގެ ގިނަ އަދަދެއްގެ ރައްޔިތުން ވަނީ އޭނާއާމެދު ފުރިހަމަ އިޙްތިރާމާއި އިއްޒަތާއެކު ކަންތައް ކުރުމަށް ގޮވާލާފައެވެ.
"އަހަރެން ބޭނުން މިވާހަކަ ރެކޯޑްކުރަން. އަހަރެންގެ ޤައުމަށް އެނބުރި ދިއުމަށްފަހު ވެސް އަހަރެންގެ ބަޔާން ބަދަލެއްގެ ނުކުރާނަން. ޕާކިސްތާންގެ އަސްކަރިއްޔާގެ އޮފިސަރުން ވަނީ އަހަންނާމެދު ވަރަށް ރަނގަޅަށް ކަންތައް ކޮށްފައި"، މިއަދު އާންމުކުރި ވީޑިއޯގައި އަބިނަންދަން ބުނާ އަޑު އިވެއެވެ.
"ރައްޔިތުންގެ ކިބައިން އަހަރެން ސަލާމަތްކުރި ކެޕްޓަން އާއި ހަނގުރާމަވެރިން އިން ފެށިގެން، އަހަރެން ގެންދިޔަ ޔުނިޓުގެ އޮފިސަރުންނާއި ހަމައަށް ވެސް އަހަރެން އުއްމީދުކުރާނީ އަހަރެންގެ އަސްކަރިއްޔާއިން ވެސް އެގޮތަށް ޢަމަލުކުރާނެ ކަމަށް. ޕާކިސްތާނުގެ އަސްކަރިއްޔާ އާމެދު އަހަރެން މިހިރީ ހިތްހަމަޖެހިފައި"، އަބިނަންދަން ބުނެއެވެ.
"އިންޑިއާ ޓައިމްސް" އިން ރިޕޯޓްކުރާ ގޮތުގައި އަބިނަންދަން އަކީ ސޫރްޔާ ކިރަން އެކްރޮބެޓިކް ޓީމް (ސްކެޓް)ގެ ކުރީގެ މެމްބަރެކެވެ. އޭގެ މާނައަކީ އޭނާ އަކީ ވަރަށް ހުނަރުވެރި ޕައިލެޓެއް ކަމެވެ.
އަބިނަންދަންގެ ބައްޕައަކީ އިންޑިއަން އެއާ ފޯސްގެ ކުރީގެ އޮފިސަރެކެވެ.
އިންޑިއާގެ އެކްސްޓާނަލް އެފެއާޒް އިން ވަނީ ވިންގް ކޮމާންޑާ ވީހާވެސް އަވަހަކަށް ރައްކާތެރިކަމާއެކު އެނބުރި އައުމަށް އެދިފައެވެ.