އިރުމަތީ ނޭޕާލްގައި ހެލިކޮޕްޓަރެއް ވެއްޓި ހިނގި ހާދިސާގައި ނޭޕާލްގެ ޓޫރިޒަމް މިނިސްޓަރ، ރަބިންދްރަ އަދިކާރީ އަވަހާރަވެއްޖެ އެވެ.
ހޯމް މިނިސްޓްރީގެ ތަރުޖަމާނާއި ހަވާލާދީ "އަލްޖަޒީރާ" އިން ރިޕޯޓްކުރާ ގޮތުގައި އަދިކާރީގެ އިތުރުން އެ ހާދިސާގައި ހަ މީހުން މަރުވެފައިވާ ކަމަށެވެ.
ނޭޕާލްގެ ތަޕްލަޔުންގ އިން ތަރާތުމް އަށް ދަތުރުކުރަމުންދިޔަ އެ ޕްރައިވެޓް ހެލިކޮޕްޓަރު ޖަންގައްޔެއް ތެރެއަށް ވެއްޓުނުއިރު، އޭގައި ތިބި ހަތް މީހުންގެ ތެރޭގައި އަދިކާރީ ވެސް ހިމެނޭ ކަމަށް އޮފިޝަލުން ބުނެއެވެ.
"ޓޫރިޒަމް މިނިސްޓަރ ރަބިންދްރަ އަދިކާރީ އާއި އިތުރު ހަ މީހެއްގެ ހަށިގަނޑު ވަނީ ހެލިކޮޕްޓަރު ވެއްޓުނު ސަރަޙައްދުން ފެނިފައި"، ހޯމް މިނިސްޓްރީގެ ތަރުޖަމާނު ރާމް ކްރިޝްނާ ސުބޭދީ ވިދާޅުވި އެވެ.
ފުލުހުންގެ ތަރުޖަމާނު އުއްތަމް ރާޖް ސުބޭދީ ވަނީ ހެލިކޮޕްޓަރު ވެއްޓުނު ސަރަޙައްދުން ފަސް މީހެއްގެ ހަށިގަނޑު ފެނިފައިވާ ކަމަށް މީގެ ކުރިން ކަށަވަރުކޮށްދީފައެވެ.
ހޯމް ސެކްރެޓަރީ، ޕްރޭމް ކުމާރް މީޑިއާ އަށް ވިދާޅުވި ގޮތުގައި އެ ހެލިކޮޕްޓަރު ދަތުރުކުރަމުން ދިޔައީ ތަޕްލަޔުންގ ޑިސްޓްރިކްޓްގެ ދީނީ ތަނެއް ކަމުގައިވާ ޕަތިވަރާ އަށް ދިއުމަށްފަހު ކަމަށެވެ.
ލޯކަލް މީޑިއާ ރިޕޯޓްތައް ބުނާގޮތުން އަދިކާރީ އެ ސަރަޙައްދަށް ދަތުރުކުރެއްވީ އަލަށް އަޅާ އެއާޕޯޓެއްގެ މަސައްކަތް ބައްލަވާލެއްވުމަށެވެ.
ހެލިކޮޕްޓަރު ވެއްޓިފައި ވަނީ ވެރިރަށް ކަތްމަންޑޫ ގެ އިރުއުތުރުން ގާތްގަނޑަކަށް 240 ކިލޯމީޓަރު ބޭރަށެވެ.
އެއާ ޑައިނެސްޓީ އަކީ ޕްރައިވެޓް ހެލިކޮޕްޓަރު އޮޕަރޭޓްކުރާ ކުންފުންޏެކެވެ. އެ ކުންފުނީގެ ހެލިކޮޕްޓަރުތައް ބޭނުންކޮށް އުޅެނީ އާންމުންނާއި ފަތުރުވެރިން، ޤައުމުގެ އެކަހެރި ސަރަޙައްދުތަކަށް ޒިޔާރަތް ކުރުމަށެވެ.
މިދިޔަ އަހަރުގެ ސެޕްޓެމްބަރ މަހުގެ ތެރޭގައި ވެސް ނޭޕާލްގެ މެދުތެރޭ ޖަންގައްޔަކަށް ހެލިކޮޕްޓަރެއް ވެއްޓި ހިނގި ހާދިސާގައި ހަ މީހުން ވަނީ މަރުވެފައެވެ.
ނޭޕާލްގައި ބޭސްވެފައިވާ އެއާލައިންތައް ޔޫރަޕިއަން ޔޫނިއަން (އީޔޫ)ގެ ވައިގެ ސަރަޙައްދުގައި ދަތުރުކުރުމަކީ މަނާ ކެމެކެވެ.