އަންނަ މާޗު މަހުގެ ތެރޭގައި ރާއްޖޭގައި ޕެރަމޮޓޯގެ ހާއްސަ އިވެންޓެއް ބާއްވަން ނިންމައިފިއެވެ.
ޕެރަމޮޓޯ މޯލްޑިވްސް 2019ގެ ނަމުގައި މި އިވެންޓު އިންތިޒާމް ކުރަނީ ސްކައިގާއިޒްގެ ފަރާތުންނެވެ.
އެސޯސިއޭޝަން އޮފް ސްކައި ސްޕޯޓްސް މޯލްޑިވްސް، އެމްފިބަޒް، ބްލޫޕީސް އަދި ރޯވިންގ އެސޯސިއޭޝަން އޮފް މޯލްޑިވްސް އާއި ގުޅިގެން ކުރިއަށްގެންދާ މި އިވެންޓް އޮންނާނީ މާޗު މަހުގެ އެއްވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ.
މި އިވެންޓްގައި ޝަޢުޤުވެރިވާ ފަރާތްތަކަށް ސްޕޮންސަރ ކުރުމުގެ ފުރުސަތު ވެސް ސްކައިގާއިޒް އިން ވަނީ ހުޅުވާލާފައެވެ. އެގޮތުން ކޮންމެ ޕެރަމޮޓޯއެއްގެ ފިޔަގަނޑުގައި ސްޕޮންސަރުންގެ ލޯގޯ ހަރުކުރުމަށް (ބްރޭންޑެޑް ވިންގްސް) 5،000 ޑޮލަރު ޗާޖުކުރާއިރު، އިވެންޓް ފެށޭ ވަގުތާއި ނިމޭ ވަގުތު ހަރުކުރެވޭ 8 ވާޓިކަލް ބެނާ މެދުވެރިކޮށް އިޝްތިހާރުކުރުމުގެ އަގަކީ 8،000 ޑޮލަރެވެ. ގިނަ ސްޕޮންސަރތައް ބުކްކުރާ ފަރާތްތަކަށް ވަރަށް ޚާއްސަ ޑިސްކައުންޓްތައް ލިބޭނެ ކަމަށްވެސް ސްކައިގާއިޒް އިން ބުނެއެވެ.
މި އިވެންޓް އިޝްތިހާރު ކުރުމުގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާއި ޓޫރިޒަމް މިނިސްޓްރީ އިން އެހީވާއިރު، އިވެންޓް ކަވާކުރުމުގައި ރާއްޖޭގެ މީޑިއާތައް ވެސް ޙަރަކާތްތެރިވާނެ އެވެ.
މީގެ އިތުރުން ސީއެންއެން އާއި އެހެނިހެން ބައިނަލްއަޤްވާމީ މީޑިއާތަކުން ވެސް މި އިވެންޓް ކަވާކުރާނެ ކަމަށް ސްކައިގާއިޒް އިން ބުނެއެވެ.
މި އިވެންޓްގެ ޙަރަކާތްތައް ދައްކުވައިދޭ ފޮޓޯ ފޮތެއް ވެސް ހެދުމަށް ހަމަޖެހިފައިވާއިރު، އައިޓީބީ ބާލިން އަދި ޑަބްލިއުޓީއެމް ލަންޑަން ޓްރެވެލް ޝޯގެ އިތުރުން ރާއްޖޭގެ ރިސޯޓްތަކަށް އެ ފޮޓޯ ފޮތް ބަހާނެ ކަމަށް ސްކައިގާއިޒް އިން ބުނެއެވެ.
ދެ ހަފްތާގެ މުއްދަތަކަށް ކުރިއަށްގެންދާ މި ޙަރަކާތުގައި ސްކައިޑައިވިންގ އާއި ޕެރެގްލައިޑިންގގެ އިތުރުން ކެއުމާއި، މިއުޒިކާއި، ބޮޑުބެރު އަދި ނެށުމުގެ ޙަރަކާތްތައް ވެސް ފެނިގެންދާނެ އެވެ.
ސްކައިގާއިޒް އިން ބުނީ ޕެރަމޮޓޯގެ ފިޔަތައް ސްޕޮންސަރ ކުރާ ފަރާތްތަކަށް ޚާއްސަކޮށް، އެ ފިޔަތައް ދައްކުވައިދޭ ހަތަރު މިނެޓުގެ ހައި ރިސޮލިއުޝަން ފިލްމެއް ވެސް އުފައްދާނެ ކަމަށެވެ.
ޙަރަކާތް ރޭވިފައިވާ ގޮތް
01 މާޗު 2019 ވާ ހުކުރު ދުވަހު، 12 ޕެރަމޮޓޯ ޕައިލެޓުންގެ ޓީމަކުން ރާއްޖޭގެ އެންމެ އުތުރުގައި އޮންނަ ތުރާކުނު އިން އެންމެ ދެކުނުގައި އޮންނަ އައްޑޫ ސިޓީ ގަމާއި ހަމައަށް ދެ ހަފްތާގެ ދަތުރެއް ފަށާނެ އެވެ. މި ދަތުރުގެ ތެރެއިން އެ ޓީމުން ރާއްޖޭގެ އެކި ރަށްތަކާއި ރިސޯޓްތައް މަތިން އުދުހޭއިރު، ތަފާތު އެކިއެކި ވައިގެ ޙަރަކާތްތައް ކުރިއަށްގެންދާނެ އެވެ. އެގޮތުން އާބާދީ އެންމެ ބޮޑު ރަށްތައް ކަމުގައިވާ ކުޅުދުއްފުއްޓާއި، މާލެ، ފުވައްމުލަކު އަދި އައްޑޫ ސިޓީ ގައި ވަރަށް ޚާއްސަ ޕެރަމޮޓޯ ޙަރަކާތްތަކެއް ކުރިއަށްގެންދަން ވަނީ ހަމަޖެހިފައެވެ. މި ދަތުރުގައި ޓީމުން ރާއްޖޭގެ 24 ރަށަކަށް މަޑުކުރާ ގޮތަށް ހަމަޖެހިފައިވާއިރު، މީހުން ދިރިއުޅޭ ރަށްތަކުގެ މަތިން ގާތްގަނޑަކަށް 50 މީޓަރު އަދި މީހުން ދިރިއުޅޭ ރަށްތަކުގެ ތެރެއިން ގާތްގަނޑަކަށް 150 މީޓަރަށް ދަތުރުކުރުމަށް ވަނީ ހަމަޖެހިފައެވެ.
ސްކައިގާއިޒް އިން ބުނީ މި އިވެންޓްގެ މައިގަނޑު މަޤްޞަދަކީ ތަޣައްޔަރުވުމާއި މޫސުމަށް އަންނަ ބަދަލުތަކުގެ އިތުރުން ކަނޑުގެ ލޮނުގަނޑަށް އަންނަ ބަދަލުތަކާއި ގުޅޭގޮތުންނާއި، އޭގެ ސަބަބުން ރާއްޖޭގެ ރަށްތަކަށާއި، ރައްޔިތުންނަށް ކުރާނެ އަސަރުތަކާއި ގުޅޭގޮތުން ހޭލުންތެރިކަން އިތުރުކުރުން ކަމަށެވެ.
މީގެ އިތުރުން ޕެރަމޮޓޯ، ޕެރެގްލައިޑިންގ އަދި ސްކައިޑައިވިންގ ފަދަ އޭވިއޭޝަން އާއި ވައިގެ ކުޅިވަރުތައް ރާއްޖޭގައި ޕްރޮމޯޓްކޮށް، އަހަރީ ޙަރަކާތެއްގެ ގޮތުގައި މި އިވެންޓް ރާއްޖޭގައި ކުރިއަށްގެންދިއުމަކީ ވެސް މި އިވެންޓްގެ މަޤްޞަދެއް ކަމުގައި ސްކައިގާއިޒް އިން ބުނެއެވެ.
ޕެރަމޮޓޯ މޯލްޑިވްސް އިވެންޓް 2019 އާއި ގުޅޭ އިތުރު މަޢުލޫމާތު ސްކައިގާއިޒްގެ ވެބްސައިޓް www.SkyGuysMaldives.com އިންނާއި maldives.paramotor@gmail.com އަށް ނުވަތަ fly@skyguysmaldives.com އަށް އީމެއިލް ކޮށްގެން ލިބޭނެ އެވެ.