ފޯރިގަދަ މައިލޯ ސްޓްރީޓް ސޮކާ 2019 ގެ ސެމީފައިނަލުގެ މެޗުތައް ކާމިޔާބުކޮށް އެފްސީ ހަބޭސް އަދި ސްކެވެންޖާސް ފައިނަލަށް ދަތުރުކޮށްފިއެވެ.
މުބާރާތުގެ ސެމީ ފައިނަލުގެ ދެމެޗު ރޭ ކުޅެފައިވާއިރު، ފުރަތަމަ މެޗުގެ އެފްސީ ހަބޭސް ވަނީ އެފްސީ ފެލްކަން އަތުން ތަފާތު ބޮޑުކޮށް މޮޅުވެފައެވެ. ހަބޭސް މިމެޗު ކާމިޔާބުކުރީ 1-7 ގެ ނަތީޖާއަކުންނެވެ. މިއީ މުޅި މުބާރާތުގައި ވެސް މިފަދަ ތަފާތު ބޮޑު ނަތީޖާއެއް ފެނުނު ފުރަތަމަ ފަހަރެވެ.
ހަބޭސްއަށް ލަނޑުތައް ކާމިޔާބުކޮށްދިން ކުޅުންތެރިންގެ ތެރޭގައި ގައުމީ ފޯވާޑް، އިބްރާހިމް މަހުދީ ހަސަން(ކުދު އިއްބެ)، އަހުމަދު ޒައުލް ނިޒާމް، އަލީ ލިރުއާމްގެ އިތުރުން ނައުފަލް އަހުމަދު ހިމެނެއެވެ. މީގެ ތެރެއިން ކުދު އިއްބެ އަދި ޒައުލް ވަނީ ކޮންމެ ކުޅުންތެރިޔަކަށް ދެ ލަނޑު ޖަހާފައެވެ. އަދި އެފްސީ ފެލްކަން ޓީމުގެ އަބްދުﷲ އުނެއިސް އަތުން ބައިކޮޅަށް ވެސް އެއް ގޯލު ވަނީ ވަދެފައެވެ.
ދެވަނަ މެޗުގައި ސްކެވެންޖާސް އަދި އެސްއެމްޓީ ބައްދަލުކޮށްފައިވާއިރު މިމެޗުގެ ފުރިހަމަ ވަގުތު ހަމަވެގެން ދިޔައީ ދެޓީމުން ކުރެ އެއްވެސް ޓީމަކަށް ލަނޑެއް ނުޖެހިއެވެ. ނަތީޖާ ނެރެން ޕެނަލްޓީއަށް ގޮސް، ސްކެވެންޖާސް މޮޅުވީ 1-2 އިން ޕެނަލްޓީ ޝޫޓްއައުޓް ކާމިޔާބުކޮށްގެނެވެ.