މަސްތުވާތަކެއްޗާ ދެކޮޅަށް ދިވެހި ފުލުހުން ހިންގަމުން އަންނަ ބޮޑު އޮޕަރޭޝަނުގެ ތެރެއިން ށ. މިލަންދޫން ދެ މީހަކު ހައްޔަރުކޮށްފި އެވެ.
މި ދެމީހުން ހައްޔަރު ކޮށްފައިވަނީ މިލަންދޫ ޕޮލިސް ސްޓޭޝަނުން އެރަށުގައި ހިންގި އޮޕަރޭޝަނެއްގައެވެ.
ފެބުރުވަރީ 26 ވަނަ ދުވަހު ކުރިއަށްގެންދިޔަ މިއޮޕަރޭޝަންގައި، ސައިކަލެއްގައި ދުއްވާފައި ދިޔަ މިދެމީހުން ހުއްޓުވި ވަގުތު ސައިކަލު ފަހަތުގައި އިންމީހާ އެއްލައިލި އެއްޗެއް ފުލުހުން ނަގައި ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައިވާ ކަމަށް ފުލުހުން ބުނެއެވެ.
މިއޮޕަރޭޝަންގައި ހައްޔަރުކޮށްފައިވަނީ 22 އަހަރުގެ މީހަކާއި 23 އަހަރުގެ މީހެކެވެ.
މި މައްސަލައިގައި ހައްޔަރުކޮށްފައިވާ ދެ މީހުންގެ ބަންދާއިމެދު ގޮތެއް ނިންމުމަށް ށ. ފޭދޫ މެޖިސްޓްރޭޓް ކޯޓަށް ހާޒިރުކުރުމުން، މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބޭތިއްބުމަށް 15 ދުވަހުގެ މުއްދަތެއް ދީފައިވާ އިރު މިމައްސަލަ ށ. މިލަންދޫ ޕޮލިސް ސްޓޭޝަނުންދަނީ އިތުރަށް ތަޙުޤީޤު ކުރަމުންނެވެ.