ޕާކިސްތާނުން ހައްޔަރުކުރި އިންޑިއާގެ ޕައިލެޓު ސުލްޙައިގެ ނިޝާނެއްގެ ގޮތުން ހުކުރު ދުވަހު ދޫކޮށްލާނެ ކަމަށް ޕާކިސްތާނުގެ ބޮޑުވަޒީރު، އިމްރާން ޚާން ވިދާޅުވެއްޖެ އެވެ.
އިމްރާން މިހެން ވިދާޅުވެފައި ވަނީ މިއަދު މަޖިލީހުގައި ދެއްކެވި ވާހަކަފުޅުގައެވެ.
ޕާކިސްތާނުން ވަނީ ބުދަ ދުވަހު އިންޑިއާގެ އަސްކަރިއްޔާގެ ދެ ބޯޓެއް ވައްޓާލައި، އެއް ބޯޓުގެ ޕައިލެޓު ހައްޔަރުކޮށްފަ އެވެ. އޭގެ ސަބަބުން ޕާކިސްތާނާއި އިންޑިއާ އާއި ދެމެދު ފެންމަތިވެފައިވާ މައްސަލަތައް ވަނީ އިތުރަށް ހޫނުވެފަ އެވެ.
މި މަހުގެ 14 ވަނަ ދުވަހު ޕުލްވާމާ އަށް ދިން ޓެރަރިސްޓު ހަމަލާއަށްފަހު، އިންޑިއާ އިން ވަނީ އަންގާރަ ދުވަހު ޕާކިސްތާނަށް ވެސް ނުރައްކާތެރި ހަމަލާތަކެއް ދީފައެވެ.
ޕާކިސްތާނުން ބުނީ ވައިގެ ހަމަލާތައް ދިނުން ނޫން އެހެން ގޮތެއް އިންޑިއާ އިން ދޫކޮށްފައި ނުވާ ކަމަށެވެ.
މިއަދު ޕާކިސްތާނުގެ ޤާނޫނު ހަދާ މަޖިލީހާއި މުޚާތަބުކުރައްވައި ދެއްކެވި ވާހަކަފުޅުގައި އިމްރާން ވިދާޅުވީ ސުލްޙައިގެ ނިޝާނެއްގެ ގޮތުގައި މާދަމާ އިންޑިއާގެ ޕައިލެޓް ދޫކޮށްލާނެ ކަމަށެވެ.
އިންޑިއާ އާއި ޕާކިސްތާނުން ސުލްޙަވެރިކަމާއެކު އުޅެން އެބަޖެހޭކަން ފާހަގަކުރައްވައި އިމްރާން ވަނީ ދެ ޤައުމުގެ ދެމެދުގައި ހޫނުވެފައިވާ މައްސަލަ ހައްލުކުރުމަށް ގޮވާލައްވައިފައެވެ.
އިއްޔެ ޕާކިސްތާނުގެ އަސްކަރިއްޔާއިން ހައްޔަރުކޮށްފައި ވަނީ އިންޑިއަން އެއާ ފޯސް (އައިއޭއެފް)ގެ އޮފިސަރ، ވިންގް ކޮމާންޑަރ އަބިނަންދަން އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީ އިން ވަނީ ވިންގް ކޮމާންޑާ ވީހާވެސް އަވަހަކަށް ރައްކާތެރިކަމާއެކު އެނބުރި އައުމަށް އެދިފައެވެ.