ޕާކިސްތާނުގެ އަސްކަރިއްޔާއިން ދިން ވައިގެ ހަމަލާގައި އިއްޔެ ހައްޔަރުކުރި އިންޑިއަން އެއާ ފޯސް (އައިއޭއެފް)ގެ ވިންގް ކޮމާންޑަރ، އަބިނަންދަން ވަރްތަމާން އާއި ގުޅުންހުރި 11 ވީޑިއޯ ލިންކެއް ޔޫޓިއުބް އިން ނެގުމަށް، އިންޑިއާގެ އިންފޮމޭޝަން ޓެކްނޮލޮޖީ (އައިޓީ) މިނިސްޓްރީ އިން، އެ ވެބްސައިޓް އަށް އަންގައިފި އެވެ.
ސަރުކާރުގެ އޮފިޝަލަކާއި ހަވާލާދީ "ހިންދުސްތާން ޓައިމްސް" އިން ރިޕޯޓްކުރާ ގޮތުގައި އެ ވީޑިއޯތައް ނެގުމަށް އައިޓީ މިނިސްޓްރީ އިން ޔޫޓިއުބްގައި އެދިފައި ވަނީ ހޯމް މިނިސްޓްރީގެ އެންގުމުގެ ދަށުން ކަމަށާއި، އެ ލިންކްތައް މިހާރު ވެބްސައިޓުން ނަގާފައިވާ ކަމަށެވެ.
ޔޫޓިއުބް ހިންގާ ގޫގުލްގެ ތަރުޖަމާނަކު ވިދާޅުވީ ކަމާއިބެހޭ ފަރާތްތަކުން އެދޭ ޤާނޫނާއި ޚިލާފު ނޫން އެދުންތައް ފުއްދޭތޯ އެ ކުންފުނިން ވީހާވެސް ބޮޑަކަށް މަސައްކަތްކުރާ ކަމަށެވެ.
އަދި ސަރުކާރުން ގޫގުލްގެ ޚިދުމަތްތަކުން ނަގަން ބޭނުންވާ ކޮންޓެންޓްތަކާއި ގުޅޭ މަޢުލޫމާތު އެ ކުންފުނީގެ ޓްރާންސްޕޭރެންސީ ރިޕޯޓްގައި ޤަވާއިދުން ހިމެނިފައިވާނެ ކަމަށްވެސް އޭނާ ވިދާޅުވި އެވެ.
ވިންގް ކޮމާންޑަރ އަބިނަންދަން ޕާކިސްތާނުން ހައްޔަރުކޮށްފައި ވަނީ އިއްޔެ ދިން ވައިގެ ހަމަލާތަކެއްގައި، އަބިނަންދަން ދުއްވަން އިން އަސްކަރީ މަތިންދާބޯޓު ވައްޓާލުމަށްފަހު އެވެ.
އަބިނަންދަންގެ ވީޑިއޯތައް އިންޓަނެޓުގައި އާންމުވެ، ގިނަ އަދަދެއްގެ މީހުން ވަނީ އެ ވީޑިއޯތައް ޓްވިޓާ، ފޭސބުކް އަދި ވަޓްސްއެޕް ފަދަ ސޯޝަލް މީޑިއާ ޕްލެޓްފޯމްތަކުގައި ހިއްސާކޮށްފައެވެ.