ޑީސީ އިން ދާދިފަހުން ނެރުނު ކާމިޔާބު ފިލްމް ކަމުގައިވާ "އަކުއަމޭން"ގެ ދެވަނަ ފިލްމް 2022 ވަނަ އަހަރު ނެރުމަށް ނިންމައިފި އެވެ.
"އަކުއަމޭން 2"ގެ ނަމުން ނަން ދީފައިވާ މި ފިލްމް ރިލީޒްކުރުމަށް ހަމަޖެހިފައި ވަނީ 2022 ވަނަ އަހަރުގެ ޑިސެމްބަރ މަހުގެ 16 ވަނަ ދުވަހު އެވެ.
މި ފިލްމް އުފެއްދުމަށްޓަކައި ސްޓޫޑިއޯ އިން ވަނީ މި މަހުގެ ކުރީކޮޅު ޑޭވިޑް ލެސްލީ ޖޯންސަން-މެކްގޯލްޑްރިކް އާއި ފިލްމްގެ ސްކްރިޕްޓް ލިޔަން ހަވާލުކޮށްފަ އެވެ.
"އަކުއަމޭން 2" ޕްރޮޑިއުސްކުރާނީ ފުރަތަމަ ފިލްމް ޑައިރެކްޓްކުރި ޖޭމްސް ވޮން އާއި ޕީޓަރ ސެފްރެން އެވެ.
މިދިޔަ ޑިސެމްބަރ މަހުގެ 21 ވަނަ ދުވަހު ރިލީޒްކުރި "އަކުއަމޭން" ވަނީ އުތުރު އެމެރިކާގައި 330 މިލިއަން ޑޮލަރު އަދި ބައިނަލްއަޤްވާމީ ގޮތުން ޖުމްލަ 805 މިލިއަން ޑޮލަރު ހޯދާފައެވެ. އެ ފިލްމަކީ ބައިނަލްއަޤްވާމީ ބޮކްސް އޮފީހުގައި މިހާތަނަށް 20 ވަނައަށް އެންމެ ބޮޑު ފައިދާއެއް ހޯދި ފިލްމެވެ.
މި ސުޕާހީރޯ ފިލްމްގެ ޓައިޓަލް ރޯލުން ފެނިގެންދާނީ ޖޭސަން މޮމޯއާ އެވެ. ޖޭސަންގެ އިތުރުން އޭމްބަރ ހާޑް އާއި ވިލެމް ޑަފޯ އާއި ޕެޓްރިކް ވިލްސަން އަދި ޑޮލްފް ލަންޑްގްރެން އާއި ޔަހްޔާ އަބްދުލް-މަތީން 2 އަދި ނިކޯލް ކިޑްމޭން ވެސް މި ފިލްމްގެ މުހިންމު ރޯލްތަކުން ފެނިގެންދެއެވެ.