މާލެއަށް ބަނގުރާ އެތެރެކުރިކަމުގެ ތުހުމަތުގައި ފަސް މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.
ފުލުހުންނާއި ހަވާލާދީ "ވަގުތު" ނޫހުން ރިޕޯޓްކުރާ ގޮތުގައި އެ މީހުން ހައްޔަރުކޮށްފައި ވަނީ މާލެއަށް ބަނގުރާ އެތެރެކުރާ ކަމަށް ލިބުނު މައުލޫމާތަކާއި ގުޅިގެން ފުލުހުން ހިންގި ޚާއްސަ އޮޕަރޭޝަނެއްގައި މިއަދު މެންދުރުފަހު 14:35 ހާއިރު ކަމަށެވެ.
އެގޮތުން މި މައްސަލައާއި ގުޅިގެން ހައްޔަރުކޮށްފައި ވަނީ 18 އަހަރުން ދަޑުގެ ކުއްޖަކާއި، 23 އަހަރުގެ ފިރިހެނަކާއި، 24 އަހަރުގެ ފިރިހނެއްގެ އިތުރުން އުމުރުން 27 އަހަރުގެ ދެ ފިރިހެނުން ކަމަށާއި، އެމީހުން ހައްޔަރުކޮށްފައި ވަނީ ތިން ސައިކަލެއްގައި އަމީރު އަހްމަދު މަގުން ދަނިކޮށް ކަމަށްވެސް ފުލުހުން ބުނެއެވެ.
ފުލުހުން ބުނީ ބަނގުރާފުޅިތައް ފެނިފައި ވަނީ އޭގެ ތެރެއިން ކޮންމެ ސައިކަލެއްގެ ވެސް ފަހަތުގައި އިން މީހާގެ ކޮނޑުގައި އަޅުވާފައި އޮތް ދަބަހުން ކަމަށެވެ. އެގޮތުން ކޮންމެ މީހެއްގެ އަތުގައި އޮތް ދަބަސް ތެރެއިން ހަތް ބަނގުރާފުޅި ފެނިފައިވާ ކަމަށް ފުލުހުން ބުނެއެވެ.
ދެ ސައިކަލްގައި ތިބި ހަތަރު މީހުން ހައްޔަރު ކުރި އިރު އެއް ސައިކަލް ދުއްވަން އިން މީހާ ވަނީ ފިލާފަ އެވެ.
ފުލުހުން ބުނީ އެ މީހާ ފިލި އިރު ދަބަސް ހިފައިގެން އިން މީހާ މަގުމައްޗަށް ދަބަސް އެއްލައިލުމުގެ ސަބަބުން އެ ދަބަހުގައި އޮތް ހަތްފުޅީގެ ތެރެއިން ދެ ފުޅި ތެޅިފައިވާ ކަމަށާއި، ދަބަސް ހިފައިގެން އިން މީހާ ހައްޔަރު ކުރީ ސައިކަލުން ފައިބައިގެން ފިލަން މަސައްކަތް ކުރަނިކޮށް ކަމަށެވެ.