މަޝްހޫރު ޓީވީ ޝޯ، "ބްރޫކްލިން ނައިން-ނައިން" ހަތްވަނަ ސީޒަނަކަށް އާކޮށްފި އެވެ.
ރިޕޯޓްތައް ބުނާގޮތުން ނޭޝަނަލް ބްރޯޑްކާސްޓިންގ ކޮމްޕެނީ (އެންބީސީ) އިން ވަނީ މިދިޔަ ބުދަ ދުވަހު، އެ ކޮމެޑީ ސީރީސް ހަތްވަނަ ސީޒަނަކަށް އާކުރުމަށް ނިންމާފައިވާކަން އިއުލާންކޮށްފަ އެވެ.
10 މެއި 2018 ގައި "ފޮކްސް" އިން ވަނީ އެ ޝޯ ފަސް ސީޒަނަށްފަހު ކެންސަލްކޮށްފަ އެވެ. ނަމަވެސް އޭގެ އެއް ދުވަސް ފަހުން އެންބީސީ އިން ވަނީ އެ ސީރީސް، 13 އެޕިސޯޑްގެ ހަވަނަ ސީޒަކަށް އާކޮށްފަ އެވެ. އަދި 7 ސެޕްޓެމްބަރ 2018 ގައި އެންބީސީ އިން ވަނީ ހަވަނަ ސީޒަންގެ އެޕިސޯޑްތަކުގެ އަދަދު 18 އަށް އިތުރުކުރުމަށް ނިންމާފަ އެވެ.
މި ސީރީސްގެ ހަވަނަ ސީޒަން މިދިޔަ ޖެނުއަރީ މަހުގެ 10 ވަނަ ދުވަހު ފަށާފައިވާއިރު، ހަތްވަނަ ސީޒަނަކަށް ސީރީސް އާކުރާނެ ކަމަށް އެންބީސީ އިން އިއުލާންކުރީ ބުދަ ދުވަހު އެވެ.
ޑެން ގޯ އާއި މައިކަލް ޝާރ އުފެއްދި މި ސީރީސް އާންމުންގެ ތެރޭގައި ވަރަށް ބޮޑު މަޤްބޫލްކަމެއް ހޯދާފައިވާ ސީރީސް އެކެވެ.
"ބްރޫކްލިން ނައިން-ނައިން"ގެ ފުރަތަމަ ސީޒަން ރިލީޒްކުރީ 2013 ވަނަ އަހަރުގެ ތެރޭގައެވެ.