މި އަހަރުގެ ލަވް ޓްރެވެލް އެވޯޑްސްގައި އިންޑިއާ ކަނޑުގެ އެންމެ ރޮމޭންޓިކް ރިސޯޓް ހޮޓެލްގެ އެވޯޑް، ހުރަވަޅި މޯލްޑިވްސް ރިސޯޓަށް ލިބިއްޖެ އެވެ.
މި އެވޯޑް ހުރަވަޅި މޯލްޑިވްސް އާއި ހަވާލުކޮށްފައި ވަނީ މިދިޔަ ފެބްރުއަރީ މަހުގެ 18 ވަނަ ދުވަހު އޮސްޓްރިއާގެ ވެރިރަށް ވިއެނާގެ ލިކްޓެންސްޓައިން ގާޑެން ޕެލެސްގައި ބޭއްވި ހަފްލާއެއްގަ އެވެ.
"މިއީ އަޅުގަނޑުމެންނަށް ލިބުނު އިތުރު ބޮޑު ކާމިޔާބީއެއް އަދި އަޅުގަނޑުމެންގެ ޓީމް ކުރާ މަސައްކަތުގެ ހެއްކެއް"، އެ ރިސޯޓުން ނެރުނު އިއުލާނުގައި ބުނެފައި ވެއެވެ.
ކޮންމެ އަހަރަކު ބާއްވާ ލަވް ޓްރެވެލް އެވޯޑްސް އަކީ ދުނިޔޭގެ އެކި ރޮމޭންޓިކް ހޮޓެލްތަކާއި ރިސޯޓްތަކަށް ވަރަށް ޚާއްސަ އެވޯޑެކެވެ. މިއީ އެހެން ހޮޓެލްތަކާއި ރިސޯޓްތަކަށްވުރެ ހުރިހާ ގޮތަކުން ވެސް ފެންވަރު މަތި ރިސޯޓްތަކަށް ދެވޭ އެވޯޑެކެވެ.
ދާދިފަހުން ވެސް ހުރަވަޅި އަށް ވަނީ އެންމެ ރޮމޭންޓިކް ހޮޓެލްގެ ބައިނަލްއަޤްވާމީ އެވޯޑެއް ލިބިފައެވެ.
މި އަހަރުގެ ޓްރިޕް އެޑްވައިޒަރގެ ޓްރެވެލާސް ޗޮއިސް އެވޯޑްސްގައި އޭޝިއާގެ 10 ވަނަ އަށް އެންމެ ރޮމޭންޓިކް ރިސޯޓު، އަދި ރާއްޖޭގެ ހަތަރު ވަނަ އަށް އެންމެ ރޮމޭންޓިކް ރިސޯޓްގެ ޝަރަފުވެސް ލިބިފައި ވަނީ ހުރަވަޅު ރިސޯޓަށެވެ.
2016 ވަނަ އަހަރުގެ ޖެނުއަރީ މަހުގެ ތެރޭގައި ރަސްމީކޮށް ހުޅުވި މި ފަސް ތަރީގެ ރިސޯޓަށް 40 މިނެޓު ތެރޭގައި ސީޕްލޭނުން ދަތުރުކޮށްފައި ދެވެއެވެ. މި ރިސޯޓުގައި ޖުމްލަ 90 ވިލާ ހުންނައިރު، އޭގެ ތެރޭގައި 60 އޯޝަން ވިލާ އާއި 30 ބީޗު ވިލާ ހިމެނެއެވެ.